Çdo vit, më 30 maj, shënohet Dita Botërore e Sklerozës Multiple, një ditë për të rritur ndërgjegjësimin dhe për të inkurajuar diskutimin mbi këtë sëmundje kronike, progresive dhe komplekse që prek sistemin nervor qendror.
Çfarë është Skleroza Multiple?
Skleroza Multiple është një sëmundje inflamatore që dëmton mielinën, shtresën mbrojtëse që rrethon fibrat nervore në tru dhe në palcën kurrizore.
Ky dëmtim pengon transmetimin normal të impulseve nervore, çka çon në një mori simptomash që ndryshojnë nga personi në person.
Termi “Sklerozë Multiple” nënkupton praninë e shumë plagëve në tru dhe palcë, që janë pasojë e dëmtimit të mielinës.
Simptomat
Shenjat e para zakonisht shfaqen në moshë të re, mes 25 dhe 35 vjeç, dhe mund të përfshijnë:
• Humbje të përkohshme të shikimit me njërin sy
• Vështirësi në dallimin e ngjyrave apo shikim të dyfishtë
• Mpirje në gjysmën e fytyrës apo në njërën anë të trupit
• Dobësi apo paralizë të gjymtyrëve
• Vështirësi në ecje apo qëndrueshmëri
• Probleme urinare ose seksuale
Në shumicën e rasteve, simptomat fillestare lidhen me sistemin vizual. Sëmundja ndjek shpesh një formë “relapsing-remitting”, ku simptomat shfaqen, qetësohen pas trajtimit, por më pas rikthehen me forma të ngjashme ose të reja.
Si diagnostikohet Skleroza Multiple?
Procesi i diagnostikimit përfshin disa hapa:
• Vlerësimi i simptomave dhe ekzaminimi neurologjik
• Rezonanca magnetike (MRI) e trurit dhe palcës së kurrizit
• Punksioni lumbal (analiza e lëngut trunoshpinor)
• Teste elektrofiziologjike si VEP apo SEP, që matin funksionin e nervave
Trajtimi
Megjithëse aktualisht nuk ka një kurë përfundimtare për Sklerozën Multiple, ekzistojnë trajtime që ndihmojnë në menaxhimin e sëmundjes.
Ato ndahen në dy faza:
1. Terapia e sulmit (relapsit) – zakonisht me doza të larta kortikosteroidesh për të ulur inflamacionin dhe për të lehtësuar simptomat akute.
2. Terapia afatgjatë imunomodulatore – që synon të zvogëlojë frekuencën e rikthimit të simptomave dhe të ngadalësojë përparimin e sëmundjes.
Një realitet global
Sot, mbi 2.8 milionë njerëz në botë jetojnë me Sklerozë Multiple. Edhe pse sfiduese, sëmundja mund të menaxhohet më mirë falë përparimeve në diagnostikim, terapi dhe mbështetje psikologjike.
Kjo ditë botërore na fton të informohemi, të jemi solidarë dhe të mbështesim kërkimin shkencor drejt zbulimit të një kure.
