Këshilltarët bashkiakë të opozitës kanë dërguar sot propozimin për shtimin e tre pikave në rendin e ditës. Anëtari i këshillit Dorian Teliti ka deklaruar se ka ardhur koha që kryetari i bashkisë Erjon Veliaj të dalë para këshilltarëve dhe të japë llogari në lidhje me faktin se ku kanë shkuar paratë nga afër 5D. (lexo këtu)
“Ky rend dite nuk përmban 3 kërkesat themelore për zbardhjen e 5D. Veliaj të dalë nesër para këshilltarëve e të japë llogari seku kanë shkuar paratë e 5D, pse kanë dështuar instrumentet. Si ka mundësi që kanë marrë titullin e Investitorit Strategjik. Veliaj në kuadër të këtij skandali duhet të japë llogari para këshillit. Detyra e tij është të dalë para Parlamentit të Tiranës.Kërkojmë ngritjen e një komisioni financiar, që mund të kërkojë auditim dhe auditues të jashtëm, të paanshëm”, tha ai.
Për çfarë akuzohen zyrtarët e Bashkisë së Tiranës?
Zyrtarët e Bashkisë së Tiranës Bashkisë akuzohen nga Prokuroria e Posaçme, se kanë lehtësuar një skemë korrupsioni që ka mundësuar përfitimin e dhjetëra tenderave publikë nga një kompani private, që dyshohet se zotërohet “de facto” nga Redi Molla dhe Mariglen Qato, i pari ish-drejtor i Ujësjellësit të Tiranës dhe i dyti ish-drejtues i Inspektoratit të Mbrojtjes së Territorit, aktualisht administrator i ndërmarrjes së Bashkisë, Tirana DC.
Qato dhe Molla u arrestuan pasi Gjykata e Posaçme caktoi masën e sigurisë “arrest me burg” ndaj tyre, ndërsa 5 zyrtarë të tjerë u lanë në masën e arrestit “detyrim për t’u paraqitur në policinë gjyqësore”. Gjykata ka vendosur gjithashtu arrest me burg edhe për Taulant Tushën, një tjetër ish-drejtues i rëndësishëm i Bashkisë së kryeqytetit që ndodhet aktualisht në qeli për çështjen e inceneratorit të Tiranës.
