Kreu i Air India, Natarajan Chandrasekaran, ka deklaruar se të dy motorët e avionit Boeing 787-8 Dreamliner, i cili u rrëzua javën e kaluar në Ahmedabad, ishin në gjendje të mirë teknike dhe nuk kishin pasur asnjë problem të regjistruar më parë.
Në një intervistë për “Times Now”, Chandrasekaran theksoi se motori i djathtë ishte vendosur rishtas në mars 2025, ndërsa motori i majtë kishte kaluar mirëmbajtjen e fundit në vitin 2023 dhe ishte planifikuar për kontroll të radhës në dhjetor 2025.
“Të dy motorët kishin histori të pastër. Nuk kishte sinjale për ndonjë defekt të mundshëm,” tha ai.
Këto deklarata vijnë ndërkohë që ekipet hetimore janë ende në fazën e analizës së të dhënave nga kutitë e zeza të avionit, për të rindërtuar momentet e fundit të fluturimit AI171, i cili u rrëzua vetëm pak sekonda pas ngritjes nga pista.
Avioni kishte si destinacion Londrën dhe mbante mbi 240 pasagjerë dhe ekuipazh në bord.
Në aksidentin tragjik humbën jetën të paktën 279 persona, ndërsa vetëm një pasagjer ka mbijetuar, një shtetas britanik me origjinë indiane. Ai ndodhej në pjesën e përparme të avionit dhe u nxor i plagosur nga rrënojat.
Sipas burimeve të aviacionit civil, fluturimi lëshoi një sinjal emergjence menjëherë pas ngritjes, përpara se të humbiste lartësinë dhe të përplasej mbi një kompleks banimi pranë aeroportit të Ahmedabadit, duke shkaktuar një shpërthim të madh dhe dëme të konsiderueshme në zonë.
Eksperti i hetimeve të aksidenteve ajrore, Kishore Chinta, shpjegoi për BBC se mosha e motorit nuk është tregues i sigurisë teknike, sidomos në rastin e motorëve Genx-1B, që përdoren në këtë tip avioni.
“Një motor i ri nuk garanton gjendje optimale funksionale dhe një motor i përdorur mund të jetë shumë i sigurt, nëse mirëmbajtja është kryer siç duhet,” tha Chinta.
Deri tani është gjetur njëra nga kutitë e zeza, ajo që përmban regjistruesin e të dhënave të fluturimit, ndërsa regjistruesi i zërit në kabinë ende nuk është lokalizuar.
Autoritetet indiane kanë nisur hetime të plota për të përcaktuar shkakun e saktë të rrëzimit, ndërsa analizohen të gjitha pistat teknike dhe operative.
Ky aksident renditet ndër më tragjikët në historinë moderne të aviacionit civil në Indi dhe ka rikthyer vëmendjen ndërkombëtare tek siguria ajrore, mirëmbajtja dhe monitorimi i flotës në kohë reale.
