Një grup prej 26 organizatash ndërkombëtare dhe shqiptare për lirinë e medias dhe shoqërinë civile i kanë dërguar sot një letër të hapur Kryetarit të Kuvendit të Shqipërisë, Niko Peleshi, si dhe drejtuesve të grupeve parlamentare, duke ngritur alarmin për planet e shumicës që synojnë kufizimin e aksesit të gazetarëve në Parlament.
Në letrën e tyre, organizatat theksojnë se nisma për të hequr filmimet e pavarura dhe për të kufizuar kontaktet spontane të gazetarëve me deputetët e ministrat përbën një rrezik serioz për transparencën dhe demokracinë.
Ato kërkojnë ruajtjen e aksesit të plotë dhe real të gazetarëve në veprimtarinë parlamentare, shmangien e çdo praktike që pengon pyetjet e drejtpërdrejta dhe spontane, si dhe respektimin e standardeve europiane për lirinë e medias, të cilat Shqipëria është e angazhuar t’i zbatojë në kuadër të procesit të integrimit në Bashkimin Europian.
Sipas organizatave, kufizimi i qasjes së gazetarëve në Kuvend do të ishte një hap i rrezikshëm prapa, duke cenuar rëndë të drejtën e qytetarëve për informim dhe duke minuar llogaridhënien e përfaqësuesve të zgjedhur.
Ky apel vjen në një moment të ndjeshëm, kur shqetësimet për gjendjen e lirisë së medias në vend janë në rritje, ndërsa pritet reagimi zyrtar i kryeparlamentarit Peleshi dhe i mazhorancës.
