Poeti shqiptar Agim Doçi i cili pësoi një hemoragji cerebrale, që prej mëngjesit të djeshëm vijon të mbetet i shtruar në QSUT.
Gjendja shëndetësore e poetit nuk ka asnjë përmirësim edhe pse bluzat e bardha po e mbajnë në monitorim të vazhdueshëm dhe po japin shërbim mjekësor intensiv.
Aktualisht ai po mbahet në monitorim nga mjekët neurokirurgë dhe ndodhet në gjendje kritike për jetën.
Në lidhje me gjendjen e Doçit pati dje një reagim dhe nga QSUT, ku thuhej se kantautori ishte referuar nga spitali i Pogradecit.
“Agim Doci u hospitalizua në orët e para të mëngjesit (të së shtunës) në Shërbimin Neurovaskular, ku shfaqi në mënyrë të menjëhershme çrregullim të të folurit dhe pamundësi në ruajtjen e ekuilibrit!
Doci u referua nga Spitali Bashkiak i Pogradecit ku kishte ndodhur aksidenti vaskular cerebral!
Në QSUT u ekzaminua menjëherë me skaner/angioskaner dhe rezonancë koke.
Nga ekzaminimi u evidentua një ishemi pontine dhe cerebrale e djathtë.
Pacienti është në monitorim të vazhdueshëm në Qendrën Stroke, dhe prej orëve të para të mëngjesit ekipi i mjekëve dhe Prof. Alma Cani, drejtoreshë e QSUT po ndjekin ecurinë e pacientit i cili momentalisht ndodhet në gjendje kritike për jetën”, thuhej në reagimin e QSUT.
