Prokurorët e përgjithshëm të 22 shteteve amerikane ngritën padi për të bllokuar masën e Presidentit Donald Trump për t’i dhënë fund praktikës së shtetësisë përmes lindjes, e cila garanton shtetësinë për fëmijët që lindin në SHBA, pavarësisht statusit të prindërve të tyre.
Urdhri ekzekutiv i Trump, i nënshkruar të hënën, synon përmbushjen e një premtimi të fushatës presidenciale, por suksesi i tij mbetet i pasigurt për shkak të faktit se e drejta për shtetësi përmes lindjes është e garantuar nga Amendamenti i 14-të i Kushtetutës amerikane.
Prokurorët e shteteve me shumicë demokrate dhe organizatat e të drejtave të emigrantëve argumentojnë se shtetësia përmes lindjes është një e drejtë ligjore dhe se presidentët, pavarësisht autoritetit të gjerë që kanë, nuk mund të ndryshojnë ligje themelore me një urdhër ekzekutiv.
“Presidenti nuk mund të shfuqizojë Amendamentin e 14-të me një të rënë të lapsit, pikë!”, tha Prokurori i Përgjithshëm i Nju Xhersit, Matt Platkin.
Shtëpia e Bardhë reagoi duke thënë se është e gatshme të përballet me shtetet në gjykatë dhe i quajti paditë “pjesë të rezistencës së së majtës”.
Zëvendëssekretari i shtypit i Shtëpisë së Bardhë, Harrison Fields, theksoi se opozita mund të zgjedhë të pranojë vullnetin e popullit ose të vazhdojë të kundërshtojë.
Në këtë debat, është në qendër e drejta e shtetësisë për fëmijët që lindin në SHBA, pavarësisht statusit të prindërve.
Mbështetësit e kësaj të drejte argumentojnë se është garantuar nga Amendamenti i 14-të, ndërsa kundërshtarët, përfshirë Trump dhe aleatët e tij, kërkojnë rregulla më të rrepta për fitimin e shtetësisë.
SHBA është ndër rreth 30 shtete që ofrojnë shtetësinë përmes lindjes, ndërsa shumica e vendeve të tjera ndjekin politikën e “së drejtës së gjakut”, duke e kufizuar shtetësinë për fëmijët e prindërve të ligjshëm.
