Vaksinimi masiv kundër COVID-19 vijon në të gjithë vendin tonë, tashmë edhe për grup moshën mbi 60 vjeç. Ministrja e Shëndetësisë, Ogerta Manastirliu, mëngjesin e kësaj të mërkure bën me dije se deri më tani, janë vaksinuar në total më shumë se 200 mijë të moshuar.
“Me lajmin e mirë se, më shumë se 200,000 gjyshe dhe gjyshër janë sot më të mbrojtur nga covid19 ju uroj një ditë të mbarë”, shkruan Manastriliu.
Në videon e postuar nga ministrja në rrjetin social “Facebook”, shihen disa të moshuarve të vaksinuar, të cilët shprehen të kënaqur që kanë bërë vaksinën, pasi tashmë ndjehen më të mbrojtur, duke theksuar se nuk i ka shkaktuar asnjë efekt anësor, ndërsa falënderojnë qeverinë.
Ndërkohë një ditë më parë në vend ka filluar edhe vaksinimi i dializantëve dhe të personave që kanë kryer transplante, pranë qendrave të dializës në të gjithë vendin. Deri më tani, në vend janë kryer 281.216 vaksinime, ku vetëm dje u vaksinuan 13.685 persona.
Siç kanë premtuar disa ditë më parë Edi Rama dhe ministrja Manastirliu, vaksinimi pritet të përfundojë brenda 14 muajve, ku e gjithë popullata do të jetë e vaksinuar. Megjithatë, me efektet anësore që paraqesin disa nga vaksinat, qytetarët janë stepur disi në marrjen e dozës.
