Teksa ka nisur hapja graduale e vendit, autoritetet shëndetësore vijojnë të bëjnë thirrje për kujdes dhe vëmendje, duke u përshtatur me mënyrën e re të jetesës.
Mirëpo, rihapja totale e vendit nuk është parashikuar dhe mbetet ende një vendim në diskutim.
Shefja e Survejancës dhe Shërbimit të Inteligjencës Epidemike në ISHP, Eugena Tomini në një lidhje në emisionin “Opinion” e pyetur nëse data 18 maj do të shënojë hapjen totale dhe përfundimtare të vendit, ajo e mohoi diçka të tillë dhe u shpreh se në fundin e majit deri në fillim të qershorit do të merret një vendim.
“Data 18 nuk do të jetë përfundimtare, por përkon me 97% të hapjes së aktiviteteve në vijimësi. Do të kemi përsëri aktivitete sportive që do të vlerësohen, aktiviteti urban… Jemi në diskutim edhe për fashën orare, por pas datës 18 do të bëhet publike. Sipas gjasave apo parashikimeve të kryera deri në këto momente, fundi i Majit, java e parë e Qershorit, duke monitoruar tre kriteret: Numri i rasteve të reja, numri i shtrimeve dhe numri i personave në terapi do të krijojnë hallkat zinxhir të hapjes progresive drejt asaj përfundimtare”, u shpreh Tomini.
Kujtojmë se ditën e sotme ka nisur faza e dytë e rihapjes së vendit, pasi janë hapur parukeritë, berberët, klinikat dentare dhe dyqanet në qendrat tregtare, si edhe është zgjeruar orari i lëvizjes së automjeteve brenda qarkut nga ora 05:00-17:30.
Sakaq, edhe të gjithë të riatdhesuarit do vetë karantinohen në banesa.
Ndërkohë, në datën 18 maj do të hapen shërbimet bar-restorant vetëm në ambientet e jashtme deri në orën 17:30, si edhe dhtohen fluturimet e të riatdhesuarve.
