Sot shënohet dita e 15-të e luftës në Ukrainë, e ndërkohë që forcat ruse nuk po avancojnë në përparimin e tyre, përsëri sulmet ndaj civilëve mbeten prezente.
Mbrëmjen e djeshme rusët bombarduan një maternitet në Mariupol, ku raportohet se deri më tani janë plagosur të paktën 12 persona. Presidenti i Ukrainës, Volodymyr Zelenskyy e konsideroi një gjenocid. Një ndërtesë banimi pranë qytetit të Kharkiv u qëllua me granatë gjatë natës nga forcat ruse duke shkaktuar të paktën 4 viktima, nga të cilët 2 prej tyre ishin fëmijë. Sulmi thuhet se ka ndodhur në fshatin Slobozhanske, në juglindje të Ukrainës. SES shtoi se një vajzë pesëvjeçare e plagosur është dërguar me urgjencë në spital për trajtim.
Ekipet e shpëtimit pritet të vazhdojnë operacionet e kërkimit sot për të nxjerrë trupat nga rrënojat, shtuan ata. Një qendër tregtare u dogj gjithashtu nga bombardimet në zemër të Kharkiv – megjithatë nuk është raportuar për viktima.
Ndërkohë që sot pritet të takohen në Turqi ministri i e Jashtëm rus Sergey Lavror dhe ai ukrainas, Dmytro Kuleba.
Kujtojmë që Shtëpia e Bardhë ka paralajmëruar se Rusia mund të përdorë armë kimike në Ukrainë. Nga ana tjetër, Presidenti amerikan Joe Biden do të zhvillojë një bisedë telefonike me presidentin turk Rexhep Tajip Erdogan për të diskutuar mbi zhvillimet e fundit në luftën në Ukrainë.
