Çdo vit, më 12 qershor, bota ndalet për të reflektuar mbi një nga plagët më të rënda sociale: shfrytëzimin e fëmijëve për punë.
Kjo ditë u shpall për herë të parë në vitin 2002 nga Organizata Ndërkombëtare e Punës (ILO), me synimin për të rritur ndërgjegjësimin dhe për të nxitur veprime konkrete në luftën kundër punës së papërshtatshme për moshat e vogla.
Që prej asaj kohe, 12 qershori është kthyer në një pikë referimi globale, duke shërbyer si nxitës i lëvizjeve dhe reformave në shumë vende.
Kjo është reflektuar edhe në përhapjen e ratifikimeve për dy prej instrumenteve kryesore ndërkombëtare të ILO-së: Konventa Nr. 182, që ndalon format më të rënda të punës së fëmijëve, dhe Konventa Nr. 138, që përcakton moshën minimale për punësim.
Organizatat që mbrojnë të drejtat e fëmijëve janë angazhuar për hartimin e strategjive konkrete për uljen e këtij fenomeni.
Megjithatë, vetë ILO thekson se jo çdo lloj pune që kryejnë fëmijët është për t’u dënuar apo ndaluar. Ajo bën dallimin mes punës së dëmshme dhe asaj të lehtë, e cila nuk ndikon negativisht në shëndetin, zhvillimin apo arsimimin e tyre.
Për shembull, ndihma që fëmijët ofrojnë në shtëpi, përfshirja në biznese familjare ose angazhimi në aktivitete gjatë pushimeve shkollore, kur nuk pengojnë procesin mësimor, konsiderohen përvoja të dobishme që i ndihmojnë të përgatiten për jetën si të rritur aktivë dhe të përgjegjshëm.
Në këtë ditë, mes thirrjeve për veprim, mesazhi është i qartë: fëmijët kanë të drejtën të jetojnë fëmijërinë e tyre, të sigurt, të arsimuar dhe të lirë nga çdo formë shfrytëzimi.
