Para pak ditësh, në Vaqarr u zhvillua një operacion, teksa u sekuestruan rreth 119 kg kokainë. Droga ishte nisur nga Ekuador drejt Zico Sh.A në magazinat e tyre në Vaqarr, kompanisë së “Bana King” me pronar Trifon Murataj.
Nga gjithë ky sekuestrim i kësaj sasie të madhe droge, ajo që mbetet mister është fakti se si skaneri nuk e ka konstatuar drogën, ndonëse në kamion ishin 100 pako kokainë, por që burime deklarojnë se në kontejner ka pasur 1925 kg kokainë, ndërsa disa nga këto pako janë hequr më përpara.
Pas skandalit me kokainën e fshehur në kontejnerin me banane, policia arrestoi Marson Murataj 34 vjeç, banues në Tiranë, administrator i firmës import-eksporti me vendet e Amerikës Latine, Gëzim Kalaja dhe Hasan Saliu drejtues të makinave të firmës, Zico Sh.A. Kjo e fundit njihet ndryshe edhe si “Bana King”.
Murataj një nga të ‘piketuarit’ e rastit konkret, figuron si administrator i firmës, por në të vërtet ai është krye-menaxher i pritjes së kontejnerëve në Durrës, transportit të tyre në magazina dhe shpërndarjen e bananeve tek konsumatori. Lajmi në fakt ka marrë ‘dhenë’, ndërsa për sekuestrimin e kokainës e fshehur ‘mirë e bukur’ në banane, nuk ka pasur një reagim zyrtar nga ana e ministrit të brendshëm, Bledi Çuçi, drejtorit të policisë, Gledis Nano, dhe as nga ana e drejtorit të Portit të Durrësit, Pirro Vengu.
Policia madje nuk ka marrë as pyetje as Trifon Murataj, pronarin e kompanisë së bananeve. Ndërkohë ajo që bëhet e ditur është se pronari, pasi ka shkarkuar ngarkesën me kokainë dhe banane, një ditë më pas ka njoftuar Gledis Nanon në telefon dhe policia ka shkuar në magazinat e firmës më dt. 30 dhjetor 2021. Janë pikërisht të gjithë këto fakte që do të bëjnë që në këto hetime të jetë edhe Prokuroria e Posaçme për të kuptuar përfshirjen e zyrtarëve publikë. Misteret në këtë skandal nuk kanë fund, ndërsa në hetime është edhe SPAK.
