Kreu i partisë Demokratike, Lulzim Basha ka deklaruar se kryeministri Edi Rama ka dështuar plot 100 herë në tetë vjet qeverisje.
Me anë të një postimi në instagram, Basha solli në vëmendje premtimet e Ramës mbi arsimin në vend. Ai theksoi se Rama premtoi arsimin falas për të gjithë por diçka e till nuk u bë kurrë realitet, madje sipas Bashës vetë Rama e ka pranuar se “nuk ka arsim falas për të gjithë”.
Lideri opozitar nënvizon se kanë mbetur dhe 63 ditë deri më 25 Prill, për të rrëzuar Ramën nga pushteti, pasi vetëm ka mashtruar popullin shqiptar.
“Rama kishte premtuar arsim të lartë falas. Ai vetë deklaroi më vonë se arsim të lartë falas për të gjithë në Shqipëri nuk ka”, shprehet Basha.
Dy javë më parë, Basha prezantoi programin e PD për arsimin ku ndër të tjera premtoi bursë të plotë për çdo student që vjen nga familje me të ardhura nën 64 000 lekë dhe gjysmëbursa për studentët nga familje me të ardhura mbi 64 000 lekë.
Kreu demokrat garantoi gjithashtu edhe pavarësinë e universiteteve dhe lirinë e nevojshme akademike. Në planin e PD thuhej se asnjë mësues nuk do të kishte rrogën më pak se 700 euro. Një premim tjetër i dhënë janë dhe 350 mijë tekste shkollore që do të jepen falas.
