Një vit më parë, mesditën e 10 shkurtit 2025, karriera politike e kryebashkiakut më të korruptuar në historinë e Tiranës, Erion Veliaj, u ndërpre nga prangat. Sot, një vit pas arrestimit, Veliaj vijon të jetë në qeli, ndërsa dosja penale ndaj tij ka kaluar zyrtarisht në fazën e gjykimit, duke e futur një nga figurat më të larta të pushtetit vendor përballë drejtësisë.
Arrestimi u krye me urdhër të SPAK, në një operacion të zhvilluar nga agjentët e Prokurorisë së Posaçme dhe Byroja Kombëtare e Hetimit. Oficerët zbarkuan fillimisht në Bashkinë e Tiranës dhe më pas në banesën e tij, duke zbatuar vendimin e Gjykata e Posaçme Kundër Korrupsionit dhe Krimit të Organizuar.
Vetëm pak minuta para se të shoqërohej nga oficerët e BKH, Veliaj ishte shfaqur publikisht në përurimin e një kopshti në Yzberisht, një kontrast i fortë mes propagandës së zakonshme dhe realitetit penal që pasoi.
Dita e arrestimit u shoqërua me tensione dhe reagime të ashpra politike. Nga njëra anë, mbështetësit e tij e cilësuan procesin të motivuar politikisht, ndërsa nga ana tjetër, opozita e konsideroi arrestimin si një provë se drejtësia po godet edhe majat e pushtetit. Vetë Veliaj, përmes reagimeve publike, u shpall i pafajshëm dhe deklaroi besim te drejtësia. Megjithatë, që prej asaj dite, ai nuk ka dalë më nga qelia.
Ndërkohë, Bashkia e Tiranës ka vijuar funksionimin përmes strukturave drejtuese, ndërsa Veliaj formalisht mbetet kryetar, por realisht i përjashtuar nga ushtrimi i detyrës. Rasti i tij është kthyer në një simbol të përplasjes mes pushtetit politik dhe institucioneve të reja të drejtësisë.
Një vit pas arrestimit, çështja ka hyrë në një fazë vendimtare. Ditën e djeshme, GJKKO vendosi kalimin për gjykim në themel të dosjes penale ndaj Erion Veliajt dhe të pandehurve të tjerë, duke mbyllur fazën e hetimeve dhe duke e çuar ish-kryebashkiakun përballë provës së gjykimit.
Veliaj akuzohet për korrupsion pasiv, pastrim parash, fshehje pasurie dhe shpërdorim detyre, lidhur me përfitime të parregullta nga kompani private dhe organizata jofitimprurëse. Të pandehurit e tjerë në këtë dosje përballen me akuza për korrupsion aktiv, pastrim parash, fshehje të ardhurash dhe vepra të tjera penale.
Prej 10 shkurtit 2025, Erion Veliaj ndodhet pas hekurave. Ai dhe bashkëshortja e tij, Ajola Xoxa, akuzohen për korrupsion në nëntë raste. Ndaj tij rëndojnë gjithashtu akuzat për shpërdorim detyre, pastrim të produkteve të veprës penale ose veprimtarisë kriminale, futje ose mbajtje të sendeve të ndaluara në institucionet e ekzekutimit të vendimeve me burgim, si edhe për refuzim, mosdeklarim ose deklarim të rremë të pasurive dhe interesave private.
Një vit pas arrestimit, kryebashkiaku ndodhet përballë gjykimit, me drejtësinë që pritet të japë fjalën e saj për një nga dosjet më të rënda të korrupsionit në nivel vendor.
