Në sallën e Notre Dame në Paris, Rama vështronte me zili bisedën mes Vjosa Osmanit dhe Elon Musk.
Mediat e Berishës nuk kanë reshtur së talluri këtë xhelozi të dukshme të kryeministrit shqiptar. Por ndërsa të gjithë po qeshin me këtë skenë, askush nuk po vë re se çfarë po gatuan Rama në prapaskenë – dhurimin e thesareve tona kombëtare familjes Trump.
Nuk është fjala për një copë tokë të zakonshme. Është Sazani, një ishull me rëndësi strategjike për Shqipërinë. Dhe nuk është vetëm Sazani – është edhe Zvërneci, një tjetër xhevahir i bregdetit tonë. Dhëndri i Donald Trump, Jared Kushner, përmes kompanisë së tij “Affinity Partners” do të investojë mbi 1 miliard dollarë për të ndërtuar një resort luksoz dhe 10,000 vila. Një pronë që as vetë Trump nuk do të mund ta blinte dot me gjithë pasurinë e tij, por që Rama po ua fal sikur të ishte prona e tij personale.
Për ta bërë të mundur këtë, më 22 shkurt 2024 u ndryshua Ligji për Zonat e Mbrojtura. Papritur shfaqen terma të rinj si “turizëm i ekselencës” dhe resortet me “5 yje” bëhen më të rëndësishme se natyra jonë. Por Zverneci është zonë e mbrojtur, ndërsa ujërat përreth Sazanit janë pjesë e të vetmit Park Kombëtar Detar të Shqipërisë. Siç thotë Aleksandër Trajçe i PPNEA: “Kur ndërton në ishull, e cënon Parkun Kombëtar, sepse infrastruktura dhe mbetjet në det do të shkojnë.”
Rama tallet hapur me shqetësimet tona. Në Asamblenë e PS-së deklaroi me cinizëm: “Delirojnë për rrezikun e shkatërrimit të një parku kombëtar imagjinar, të një zone të mbrojtur që e mbrojtur nuk ka qenë kurrë.” E dëgjoni përbuzjen në zërin e tij? E shihni se si tallet me trashëgiminë tonë?
Por kjo nuk është e gjitha. Vlera e vërtetë e Sazanit është aq e madhe sa as Donald Trump me gjithë perandorinë e tij të biznesit nuk ka arritur kurrë ta kishte në pronësi. Madje të gjitha pasuritë e familjes Trump të mbledhura bashkë nuk vlejnë sa ky xhevahir i bregdetit shqiptar.
Por Rama po ua fal sikur të ishte prona e tij personale. Ironikisht, edhe pse prezantohet si një investitor i fuqishëm, dhëndri i Trump vjen në Shqipëri jo me paratë e tij, por me 2 miliardë dollarët që ka marrë nga Fondi Sovran i Arabisë Saudite. Një investim që ka ngritur shqetësime serioze edhe tek vetë komiteti këshillues i fondit saudit, për shkak të mungesës totale të përvojës së firmës së tij në treg. Kështu pra, një pjesë e çmuar e territorit tonë po i kalohet një biznesmeni që nuk ka arritur të mbijetojë në treg me forcat e veta.
New York Times zbuloi se kontaktet e Kushner me qeverinë shqiptare janë ndërmjetësuar përmes mikut të ngushtë të Ramës, oligarkut Shefqet Kastrati dhe djalit të tij Musa. Strategjia duket qartë – ndërsa Shefqet Kastrati bleu një shtëpi 7.5 milionë dollarëshe pranë rezidencës së Kushner në Florida, familja Kastrati bleu dhe një hotel 55 milionë dollarësh në Miami. Pavarësisht përfoljes së gjerë për përfshirjen e tyre, sot mbretëron heshtja totale.
Le të qeshin mediat e Berishës me xhelozinë e Ramës për Elon Musk. Ne po humbasim diçka shumë më të çmuar – një pjesë të identitetit dhe sovranitetit tonë që po dorëzohet në dorë të huaj!
/gazetareforma.com
