Dita Botërore e Luftës Kundër HIV/AIDS-it, që mbahet çdo vit më 1 Dhjetor, është një mundësi për të rritur ndërgjegjësimin për HIV/AIDS dhe për të demonstruar solidaritet ndërkombëtar në luftën kundër kësaj pandemie.
Kjo ditë shërben gjithashtu për të reflektuar mbi progresin e bërë deri tani dhe për të mobilizuar përpjekje të reja në përmbushjen e objektivit për të përfunduar HIV/AIDS deri në vitin 2030.
Në Shqipëri, raportet e fundit të UNAIDS për vitin 2024 tregojnë një rritje të numrit të rasteve të reja të diagnostikuara me HIV, me 119 raste deri në tetor. Prej tyre, 89 janë meshkuj, 30 janë femra dhe 4 janë fëmijë të vegjël.
Fatkeqësisht, një numër i konsiderueshëm i personave e kanë diagnostikuar sëmundjen në stad të vonë, duke rrezikuar kështu edhe përhapjen e infeksionit tek partnerët e tjerë.
Gjatë vitit 2024, janë regjistruar gjithsej 15 viktima nga HIV/AIDS.Rruga e transmetimit mbetet kryesisht seksuale, me një prevalencë të lartë të infeksioneve tek meshkujt që kryejnë marrëdhenie seksuale me meshkuj.
Edhe pse ky grup është në rrezik më të lartë, shumë prej tyre nuk e raportojnë infeksionin për shkak të stigmës shoqërore.
Dita Botërore e Luftës Kundër HIV/AIDS-it është një mundësi për të përkujtuar ata që kanë humbur jetën, për të inkurajuar përparimin në parandalim dhe trajtim, dhe për të festuar fitore të tilla si rritja e aksesit në shërbime.
Angazhimi ndërkombëtar dhe veprimet e koordinuara mund të kontribuojnë në përmbushjen e objektivave globale të përfundimit të HIV/AIDS deri në vitin 2030.
