Kol Kola është efektivi i policisë që u arrestua në Lezhë pasi akuzohet se ka tentuar të përdhunojë një vajzë të mitur 13 vjeçe. Policia njoftoi më herët se 62-vjeçari e ka ndaluar të miturën në rrugë dhe i ka thënë se do ta shoqëronte në komisariat, duke përfutuar edhe nga fakti që ajo nuk ishte e shoqëruar nga persona të tjerë të rritur.
Ai e çoi të miturën në një banesë në qytetin e Lezhës dhe ka bërë veprime të turpshme e gjithahstu ka tentuar të kryejë marrëdhënie sekuale me forcë. Ajo ka kundërshtuar dhe është larguar nga banesa e tmerruar. 13-vjeçarja i ka treguar gjithçka prindërve e më pas ka ngritur kallëzim për Kolën. 62-vjeçari është arrestuar nga SHÇBA dhe ndaj tij rëndon akuza për “Ngacmim seksual”.
Njoftimi i policisë për ngjarjen:
Shërbimi për Çështjet e Brendshme dhe Ankesat (SHÇBA) ka ekzekutuar urdhrin e ndalimit të Prokurorisë pranë Gjykatës së Shkallës së Parë Lezhë, në ngarkim të një punonjësi policie, me detyrë Ndihmës Specialist i Policimit në Komunitet pranë Komisariatit të Policisë Lezhë, për veprën penale, “Ngacmim seksual”. Ndalimi i 62-vjeçarit u krye pasi dyshohet se në datë 29 prill 2021, ka tentuar të kryejë marrëdhënie seksuale me një të mitur.
Nga hetimi i deritanishëm ka rezultuar se punonjësi i policisë K.K. ka shfrytëzuar rastin që e mitura ka qenë e pashoqëruar nga persona madhorë, e duke keqpërdorur atributet që i jep detyra funksionale, nëpërmjet mashtrimit se do ta shoqëronte në Komisariatin e Policisë, e ka marrë të miturën në një banesë në qytetin e Lezhës, që e kishte në përdorim. Aty dyshohet se ka kryer vepra të turpshme, duke tentuar gjithashtu të kryejë marrëdhënie seksuale. Këto veprime janë kundërshtuar nga e mitura, e cila u largua me forcë nga banesa.
Nisur nga kallzimi i të miturës dhe nga verifikimet paraprake të Policisë Gjyqësore, që dokumentoi me prova shkencore rastin, si edhe duke siguruar pamje filmike, është arritur në konkluzionin se shtetasi K.K. ka konsumuar elementë të veprës penale “Ngacmim seksual”. Hetimet vazhdojnë deri në zbardhjen e plotë të këtij rasti.
SHÇBA fton qytetarët të denoncojnë çdo rast të shkeljes së ligjit, duke telefonuar në numrin falas 0800 90 90 dhe duke garantuar reagim të shpejtë dhe të ashpër ligjor.
#08009090SHÇBA
