Është shoqëruar në polici djali i Saimir Taullaut dhe djali i xhaxhait të tij. Sajmojen Taullu dhe Klajdi Taullau janë shoqëruar në policinë e Durrësit, pasi dyshohet se të dy janë përfshirë në trafik droge. Policia e Shtetit nuk ka dhënë ende asnjë informacion për arrestimin e tyre.
Saimir Taullau u arrestua vitin e kaluar në Maqedoninë e Veriut, për t’u ekstraduar më pas në Zvicër ku është dënuar për trafik droge. Taullau u dënua me katër vite për trafik heroine, ndërsa më parë ishte arrestuar në vitin 2013, ndërsa Gjykata vendosi që ta linte në “arrest shtëpie”. Ai nuk e respektoi vendimin e Gjykatës dhe u kthye në Shqipëri, për t’u arrestuar përfundimisht në Maqedoninë e Veriut.
Saimir Taullau njihet si rival i Aldo Bares. Në vitin 2005, vëllai i Taullaut u vra, ndërsa ky i fundit akuzoi se vrasja kishte ndodhur me urdhër të Bares. Konflikti ka nisur që në vitin 1997. Kur familja Taullau zotëronte një karburant, ndërsa banda e Bares ishte duke u forcuar dhe vendoste gjoba. Sipas Taullaut, vëllai i tij i kishte pagur gjobat e Bares, derisa nuk i pagoi më dhe e vranë.
Ndër të tjera, Taullau i ka shpëtuar dy herë atentateve për ta vrarë, në vitin 2017 dhe 2018 para lokalit të tij. Ai është gjithashtu subject i OFL-së që i ka kërkuar formularin e vetëdeklarimit të pasurisë.
