Dashuria e prindit për fëmijën kalon çdo limit dhe këtë e tregon më së miri rasti i shqiptarit në Itali. Një baba 34-vjeçar shqiptar që ishte zhvendosur në Itali i ka dhuruar djalit të tij 5-vjeçar një pjesë të mushkrisë. Historia emocionuese dhe frymëzuese në të njëjtën kohë është publikuar nga e përditshmja italiane “Corriere della Sera”. Mësohet se 34-vjeçari ishte vendosur në Itali, me bashkëshorten e tij Ornela dhe me djalin e tij 5-vjeçar, i cili vuan nga talasemia dhe se i duhej bërë edhe transplanti i palcës. Mediat italiane shkruajnë se operacioni ishte i vështirë dhe zgjati 11 orë dhe me 100 personel mjekësor. Më 17 janar burri i dhuroi një pjesë të mushkërive të tij fëmijës, i cili në spital u quajt Mario, për shkak të pasionit të tij për lojën e famshëm “Super Mario”.
Pas këtij operacioni i mituri do të bëjë një jetë normale, ashtu si edhe babai i tij i cili duhet të bëjë një jetë më sportive. Në një intervistë për “Corriere della Sera”, Andueli tha se nuk e mendoi dy herë, pasi bëhej fjalë për të shpëtuar djalin e tij.
“Ai ishte i sëmurë për dy vjet, mendova se transplanti i palcës kockore që kisha bërë tashmë mund ta zgjidhte problemin, por nuk e bëri. Në dy vite të vijnë në mendje shumë gjëra dhe mendon se nuk do ta zgjidhësh dot kurrë problemin. Në vend të kësaj, falë Zotit dhe falë mjekëve gjithçka shkoi mirë, tani ai mund të shkojë në kopsht, të luajë me fëmijët e tjerë. Ai nuk rri një moment i qetë, ha pak dhe luan shumë. Për mua nuk ka asgjë më të bukur për të parë, është e mrekullueshme”, ka thënë ai.
