Mijëra emigrantë kanë mbushur një kamp të improvizuar nën një urë pranë qytetit kufitar të Teksasit, Del Rio. Azilkërkuesit përfshirë edhe nënat me fëmijë të vegjël, janë pjesë e asaj që Biden e ka cilësuar si një numër i paparë i kalimeve të paautorizuara në kufirin jugor të SHBA-së.
Numri i emigrantëve të mbledhur nën Urën Ndërkombëtare Del Rio të cilët presin që agjentët e informacionit të përpunojnë të dhënat e tyre, është rritur nga 400 që ishin një javë më parë në më shumë se 12,000 të Premten. Kryetari i Del Rio, Bruno Lozano i ka kërkuar administratës Biden burime shtesë dhe fuqi punëtore, duke thënë se mund të duhen javë për të përpunuar emigrantët e grumbulluar tani në kufi.
Patrulla Kufitare e SHBA tha se po shtonte numrin e agjentëve në zonë për të “adresuar menjëherë nivelin aktual të takimeve me emigrantët dhe për të lehtësuar një proces të sigurt, njerëzor dhe të rregullt”. Kufiri jugor ka pasur një rritje të madhe të migrimit. Shumë emigrantë janë shprehur se po largohen nga vendi i tyre për shkak të kushteve të këqija. Një numër i madh i emigrantëve janë nga Haiti, i cili është ende duke u tronditur nga një tërmet i madh që la më shumë se 2,000 njerëz të vdekur dhe mijëra të tjerë të plagosur, si dhe nga vrasja e Presidentit Jovenel Moise në korrik.
