Elenita Roshi është emëruar në krye të Muzeut Historik Kombëtar, duke sjellë me vete mbi 20 vite përvojë në menaxhimin e trashëgimisë kulturore dhe turizmit të trashëgimisë.
Lajmi u bë i ditur nga ministri i Ekonomisë, Kulturës dhe Inovacionit, Blendi Gonxhja, i cili e vlerësoi Roshin si një profesioniste me vizion të qartë për zhvillimin e institucioneve kulturore.
Në njoftimin e tij, Gonxhja theksoi rëndësinë e përvojës së saj në procesin e rindërtimit të Muzeut Historik Kombëtar, duke synuar ta shndërrojë atë në një qendër moderne edukimi dhe dialogu, tërheqëse për vizitorët vendas dhe të huaj.
Njoftimi i Gonxhes:
Elenita Roshi do të drejtojë Muzeun Historik Kombëtar. Ajo sjell mbi 20 vite përvojë në menaxhimin e trashëgimisë kulturore, turizmit të trashëgimisë, dhe zhvillimit ekonomiko-shoqëror. Elenita ka punuar gjerësisht me organizata ndërkombëtare, në projekte që fokusohen në ruajtjen dhe promovimin e trashëgimisë kulturore, sidomos në Butrint dhe Gjirokastër. Bazat e saj akademike, përfshirë një doktoraturë në marketingun e trashëgimisë kulturore dhe një bursë Humphrey/Fulbright në Universitetin Cornell të Shteteve të Bashkuara të Amerikës, plotësojnë përvojën e saj praktike.
Si pedagoge e jashtme në Universitetin Politeknik të Tiranës, Elenita kontribuon gjithashtu në ndërtimin e ekspertizës së ardhshme në menaxhimin e trashëgimisë kulturore dhe historike. Pasioni i saj për ta bërë trashëgiminë tonë tërheqëse dhe edukative, si për shqiptarët dhe për ndërkombëtarët, do t’i shërbejë procesit të rëndësishëm të rindërtimit të Muzeut Historik Kombëtar, dhe të shndërrimit të tij në një hapësirë për edukim, frymëzim dhe dialog.
