Agjencia Europiane e Barnave (EMA) ka dhënë “ok” për një dozë përforcuese të vaksinës Pfizer- BioNTech, ndaj COVID-19, për të gjithë personat mbi 18-vjeç. Agjencia Evropiane e Barnave tha se dozat përforcuese “mund të merren të paktën 6 muaj pas dozës së dytë për njerëzit që janë mbi moshën18 vjeç “.
Mësohet se rekomandimi është dhënë pasi janë studiuar të dhënat për vaksinën Pfizer e cila tregon një rritje të niveleve të antitrupave, pas rreth gjashtë muajve që mund të jetë aplikuar doza e dytë tek personat që i përkasin grupmoshës 18-55 vjeç.
Agjencia gjithashtu tha se mbështet dhënien e një doze të tretë ose të vaksinës Pfizer-BioNTech ose Moderna për njerëzit me sistem imunitar të dobësuar dhe që kanë sëmundje të rënda të paktën 28 ditë pasi të kenë marrë dozën e dytë.
Agjencia në një deklaratë tha se vendimi i saj erdhi pasi studimi tregoi se një dozë shtesë e vaksinave rriti numri e antitrupave te shumë njerëz tek të cilët u testua dhe kryesisht te njerëzit që kishin sistem të dobët imunitar. Rekomandimet për përdorimin e dozës përforcuese u shkojnë autoriteteve shëndetësore në të 27 vendet e BE -së. Disa vende tashmë kanë filluar të administrojnë doza përforcuese.
Studime të shumta kanë treguar se vaksinat Pfizer-BioNTech dhe Moderna kanë një fuqi mbrojtëse edhe disa muaj pasi njerëzit kanë marrë dozën e tyre të dytë, duke ulur rrezikun e shtrimit në spital dhe vdekjet. Shefi i Organizatës Botërore të Shëndetit u kishte bërë thirrje vendeve të pasura që të mos përdorin doza përforcuese këtë vit, duke thënë se nuk ka të dhëna shkencore që vërtetojnë se dozat përforcuese janë të nevojshme. Ai tha se vaksinat kundër COVID-19 do të viheshin në përdorim më të mirë në vendet të cilat janë në zhvillim, ku dhe shumë njerëz ende nuk kanë marrë vaksinat e tyre të para. Nga pandemia globale e COVID-19, kanë humbur jetën të paktën 4.8 milion njerëz në të gjithë botën.
