Elon Musk, drejtuesi i Tesla-s dhe SpaceX dhe njëherazi njeriu më i pasur në botë, ka njoftuar largimin e tij nga bashkëpunimi me administratën Trump, ku ka shërbyer si “Punonjës i Posaçëm Qeveritar” në kuadër të një strukture të përkohshme të quajtur Departamenti për Efikasitetin e Qeverisë (DOGE).
Ky departament u krijua me synimin për të ulur shpenzimet federale dhe për të bërë administratën më funksionale.
Në një postim në rrjetin social X, Musk falënderoi presidentin Donald Trump për mundësinë, duke thënë:
“Ndërsa koha ime e planifikuar si punonjës i posaçëm po përfundon, dua të falënderoj Presidentin @realDonaldTrump për mundësinë për të reduktuar shpenzimet e panevojshme. Misioni i @DOGE vetëm sa do të forcohet më tej dhe do të shndërrohet në një kulturë të re brenda qeverisë.”
Largimi i Musk vjen në një moment tensioni të ri, vetëm një ditë pasi ai kritikoi ashpër projektbuxhetin e ri të propozuar nga vetë Trump, i cili përfshin lehtësime të mëdha tatimore dhe rritje të ndjeshme të shpenzimeve për mbrojtjen.
Sipas tij, këto politika do të shtojnë borxhin federal dhe do të dëmtojnë objektivat e DOGE.
“Një faturë mund të jetë e madhe ose e bukur. Por nuk e di nëse mund të jetë e dyja njëkohësisht,” u shpreh Musk në një intervistë për CBS, duke e përshkruar buxhetin e ri si kontradiktor me përpjekjet për kursime.
Në fillim të angazhimit të tij, Musk kishte premtuar një ulje të madhe të buxhetit federal, me objektivin ambicioz për të kursyer 2 trilionë dollarë. Më vonë, ky objektiv u reduktua në 150 miliardë dollarë.
Gjatë funksionimit të DOGE, rreth 260,000 punonjës federalë janë shkarkuar ose larguar përmes marrëveshjeve vullnetare, por disa nga këto vendime janë sfiduar në gjykata, të cilat në disa raste kanë urdhëruar rikthimin në punë të stafit, përfshirë ata që punonin në programe të ndjeshme si ato bërthamore.
