Ekspozita “Elbasani në 100 vjet” ka hapur dyert pranë mureve historike të kalasë dhe kullës së sahatit, duke ofruar një udhëtim vizual nëpër historinë e qytetit gjatë një shekulli.
Përmes fotografive dhe momenteve të përzgjedhura me kujdes nga Qendra e Artit, vizitorët shohin figurat më të rëndësishme, ngjarjet kyçe dhe transformimet që ka pësuar Elbasani ndër vite.
Shumë qytetarë e përjetuan ekspozitën me nostalgji, duke vlerësuar rolin e saj në ruajtjen e kujtesës kolektive dhe forcimin e identitetit lokal. Ajo tërhoqi vëmendjen edhe të turistëve të huaj, të cilët ndaleshin të shihnin nga afër imazhet e qytetit.
“Vij nga Gjermania dhe po shihja këto fotografi të mrekullueshme. Më pëlqen të krahasoj ndryshimin e qyteteve dhe ju falënderoj që na ofroni mundësinë të njohim kulturën tuaj në këtë formë,”u shpreh një turiste.
Drejtori i Qendrës së Artit, Kliton Kapaj, e cilëson këtë ekspozitë si hapin e parë të një vere artistike të pasur në Elbasan. Sipas tij, gjatë gjithë muajit gusht do të zhvillohen aktivitete të larmishme për të gjitha moshat, duke gjallëruar jetën kulturore të qytetit.
