Të premten e javës së kaluar ndodhi një ngjarje e rëndë në qytetin e Laçit ku iu bë atentat biznesmenit Rakip Roli. Mendohet se motivi i ngjarjes nga ana e autorëve ishte hakmarrja.
Kujtojmë që një ditë pas ekzekutimit të biznesmenit Rakip Roli në Sanxhak të Kurbinit, policia arriti të prangosë tre autoret e dyshuar të ngjarjes. Në pranga ranë babë e bir Skënder dhe Llej Lika si dhe Klaudio Beleshi. Ata u arrestuan nga forcat e policisë të komisariatit të Kurbinit, pasditen e së shtunës brenda një banese në zonën e Fushë-Milotit.
Ndërkohë sot kanë mbërritur në Gjykatën e Kurbinit 3 të arrestuarit për vrasjen e Rakip Rolit.
Llej Lika, baba i tij Skënderi dhe Klajdi Gexhaj (Belshi) do të jenë sot përballë togave të zeza ku dhe pritet të jepet masa e arrestit.
Kujtojmë që biznesmeni 55-vjeçar Rakip Roli u ekzekutua me breshëri plumbash kallashnikovi. Biznesmeni i materialeve të ndërtimit po lëvizte me makinë luksoze tip ‘Audi Q7’ në momentin që është qëlluar për vdekje.
Automjeti me të cilin udhëtonte viktima, ka lëvizur për të paktën 500 metra nga vendi ku është qëlluar duke goditur nga pas një makinë tjetër tip ‘Audi’ ku më pas përfundoi në kanal. Biznesmeni është qëlluar nga krahu i pasagjerit me breshëri duke gjetur vdekjen e menjëhershme.
Rakip Roli, rezulton emër i njohur për policinë. Në vitin 2011 ai u arrestua pasi u përfshi në plagosjen e një 22-vjeçari, ku së bashku me një person tjetër, Petrit Sana rrahën me sende të forta të riun, duke e plagosur rëndë, pas një sherri për motive banale.
