Një ngjarje e rëndë, ku mbetën të vrarë dy persona tronditi qytetin e Mirditës më 25 shkurt.
Esmeralda dhe Vledison Filopati, motër e vëlla u ekzekutuan me armë zjarri nga Fatmir Kolacaj, ish-bashkëshorti i 36-vjeçares së ndjerë, i cili ndodhet në kërkim nga policia.
Fatmir Kolecaj qëlloi mbi viktimat në oborrin e shtëpisë së Fran Filopatit, babait të të ndjerëve, ku kishte shkuar për të parë vajzat e tij, që jetonin me Esmeraldën pas divorcit.
Mirëpo, 47-vjeçari ka hasur në rezistencën e kunatit të tij, Vledison Filopatit dhe kur Esmeralda ka dëgjuar debat mes ish-bashkëshortit dhe të vëllait, ka dalë në oborr, për t’i qetësuar.
Në debat e sipër, Kolecaj ka nxjerrë armën dhe ka qëlluar me breshëri plumbash, duke i lënë të pajetë në oborrin e shtëpisë dhe skena makabër është parë nga e gjithë familja.
Së fundmi, bëhet me dije se Fatmir Kolecaj ka vrarë veten në banesën e tij, në fshatin Zejmen.
Çifti ishin prindër të tre vajzave dhe ishin ndarë prej disa vitesh pasi Kolecaj e dhunonte të renë.
Në vendngjarje ndodhet policia e Lezhës dhe forcat RENEA, të cilat prej ditësh ishin në kërkim të tij.
Kolecaj kishte tentuar vetëvrasjen edhe në 2017 në kohën kur ishte i burgosur në Shënkoll të Lezhës, pasi u dënua për dhunë në familje dhe armëmbajtje pa leje.
