Mbrëmjen e djeshme, 30-vjeçari Kristian Marku u ekzekutua në autostradën Fier-Vlorë, teksa po udhëtonte me makinën e tij.
Sipas hetimeve të Prokurorisë, Marku ishte i përfshirë në një ngjarje të rëndë kriminale dy vjet më parë, në mars 2023, ku akuzohej për tentativë vrasje në bashkëpunim.
Ai dhe disa persona të tjerë kishin hapur zjarr ndaj makinës së Saimir Reçit pas një përplasjeje me anëtarët e familjes Bardhi, përfshirë Markun, i cili gjithashtu është njohur me emrin Kristi Bardhi. Reçi shpëtoi pasi ndodhej në automjetin e tij të blinduar.
Po ashtu, është zbuluar se targat e automjetit të atentatorëve ishin vjedhur disa ditë më parë në qytetin e Vlorës dhe i përkisnin një oficeri policie.
Hetimet për identifikimin e makinës dhe vendin ku është kryer vjedhja janë në zhvillim.
