Mbrëmjen e djeshme qyteti i Vlorës u trondit nga një breshëri plumbash që i morën jetën 38-vjeçarit Delon Troqe. 38-vjeçari u ekzekutua mbrëmjen e djeshme në lagjen “Pavarësia”, pranë pallatit të sportit “Flamurtari”. Mësohet se policia ka shoqëruar 20 persona të cilët dyshohet se kanë dijeni për ngjarjen. Grupi hetimor ka treguar se viktima, Delon Troqe ka pasur dijeni për rrezikun që i kanosej, pasi pas vrasjes, atij iu gjet një armë tip pistoletë të cilën e mbante në makinë.
Gjithashtu policia ka sekuestruar kamerat e sigurisë së zonës ku ndodhi ngjarja e rëndë dhe po heton si pistë kryesore, konfliktet e mundshme që 38-vjeçari mund të ketë pasur në Spanjë, vend nga i cili kishte ardhur pak kohë më parë.
Ndërkohë që biznesmeni është një emër i njohur në qytetin e Vlorës. Ditën e zgjedhjeve të 25 prillit ai është parë duke lëvizur me motor nëpër qytet. Sipas gazetarit Elton Qyno, viktima kishte hipur me motor dhe e donte të gjithë rrugën për vete. Qyno shton se vrasja e Delon Troqes, është nga e njëjta dorë që dominon Vlorën.
Por kush është Delon Troqe?
38-vjeçari rezulton se është kushëri me një tjetër person të përfshirë në trafikun e drogës. Ai është kushëriri i tij, Elvis Troqe, i zhdukur që prej korrikut të 2018. Nga ajo kohë e deri më sot, prej të riut nuk ka asnjë shenjë. Ky është ekzekutimi i dytë që ndodh në qytetin e Vlorës brenda 12 ditëve, ku më 10 maj u ekzekutua me breshëri kallashnikovi në makinën e tij 40-vjeçari, Bledar Birçaj, i cili gjithashtu nuk kishte shumë kohë që ishte kthyer nga Spanja. Kjo është vrasja e katërt që ndodh në katër muaj në qytetin e Vlorës.
