Pas ekzekutimit të anëtarit të bandës së Durrësit “Mond Çekiçit”, ka reaguar edhe gazetari Artan Hoxha.
Në një intervistë të dhënë për “ABCnews”, Hoxha tha se vrasja me breshëri plumbash u bë për tu dhënë një mesazh të qartë 2 personazheve të tjera të bandës, Plarent Dervishajt dhe Lulzim Berishës.
“Plarent Dervishaj ishte emër shumë i madh në Durrës, nuk ishte goditur ndonjëherë. Një nga njerëzit më të afërm të Berishës. Kishin një ftohje, por në këto momente, njeriu më përfaqësues i të dyve në Durrës ishte Çekiçi…Në mungesë të atyre që quhen si drejtues të bandës së Durrësit, njeriu më i rëndësishëm pas tyre ishte Çekiçi.”, deklaroi Hoxha.
Duke bërë një krahasim me mënyrën sesi u bë atentati ndaj Plarent Dervishajt në qershor të vitit 2019 në Shkozet, gazetari gjykon se po t’i shohësh të dyja ngjarjet duken thuajse identike.
“Autorët ishin veshur njëlloj si në vrasjen e Çekiçit, më uniforma policie, me kallashnikovë. Moskoordinimi i tyre, bëri që shoferi ta çonte fuoristradën rreth një godine, u ul dhe pati mundësi të zbriste. Po t’i shohim të dyja ngjarjet janë identike. Nuk është çudi që të jenë të njëjtët autorë, nuk u zbuluan.”
Kujtojmë se viktima e ekzekutimit të 20 marsit në Durrës ishte një emër mjaft i njohur për policinë.
“Mond Çekiçi”, konsiderohet nga policia e Durrësit si person me rrezikshmëri, pasi jo vetëm që është pjesë përbërëse e një klani kriminal në Durrës, por ai rezulton të jetë dënuar disa herë për akuzën e mbajtjes pa lejë të armëve dhe kundërshtimit të forcave të policisë.
Në muajin Maj 2009 Edmond Koçi, është dënuar me 2 vite burgim për akuzën e “Mbajtjes pa lejë të armëve”.
