Detaje të reja janë zbardhur nga atentati ndaj ish-policit Santiago Malko, pak ditë më parë në kryeqytet.
“Report tv” mëson, se Malko pas përjashtimit nga radhët e policisë, ishte bërë pjesë e Inspektoriatit të Mjedisit.
Kreu i kësaj drejtorie, Armando Lamaj, ka lënë detyrën menjëherë pas vrasjes së Malkos.
Edhe pse Lamaj argumenton se dha dorëheqjen për shkaqe personale, fakti që erdhi pas vrasjes, ngre dyshime të forta.
Malko ishte një person i skeduar edhe më parë nga policia.
Ai ishte konfliktuar në 2016-ën me vëllezërit Edmond dhe Gentian Lashi, për shkak të një borxhi për lojrat e fatit.
Gjithashtu ai ishte mik me Ervis Martinajn, një nga personat e mbetur të plagosur nga përplasja me armë në zonën e ish-bllokut, natën e 4 tetorit të vitit ta kaluar.
Ndërkohë natën kur ndodhi atentati, Malko ndiqej nga dy mjete, njëri që u dogj në fshatin Ferraj dhe tjetri me të cilin u larguan autorët.
Deri tani policia ka të dyshuar dy persona me iniciale, D.A dhe L.D, ndërsa pista kryesore ku po heton policia, është ajo e hakmarrjes për shkak të konflikteve të së shkuarës.
