Pas ekzekutimit të vëllait të Talo Çelës, Bujar Çelës, në orët e para të mëgjesit në Bradashesh të Elbasanit, forcat speciale RENEA dhe FNSH kanë shkuar në vendngjarje.
Forcat e shumta të policisë, njësitet speciale dhe ekspertë të kriminalistikës kanë rrethuar vendin e ngjarjes si dhe kanë vendosur postoblloqe e kanë bërë krehjen e zonës.
Bëhet me dije se Bujar Çela është qëlluar nga vrasës profesionistë, të armatosur dhe të maskuar, të cilët nuk i kanë lënë mundësi as të reagonte. Ngjarja ka ndodhur në orën 05.45 të mëngjesit të sotëm, në rrethrrotullimin e Bradasheshit.
Nga kërkimet e policisë, pranë fshatit Murrash është gjetur pak më parë i djegur një mjet tip ‘Renault’ me targa AA 876 DC. Dyshohet se automjeti u përket autorëve të ekzekutimit të Bujar Çelës.
Nga mënyra e ekzekutimit, duket se vrasja ka qenë e mirëorganizuar dhe autorët e kanë mbajtur nën vëzhgim gjatë gjithë kohës 50-vjeçarin Bujar Çela.
Ndërkohë vëllai i Bujar Çelës, Talo Çela, është shpallur në kërkim ndërkombëtar për grabitjen e miliona eurove në Rinas.
Sipas informacioneve nga vendngjarja, dyshohet se kanë qenë 4 autorë të kamufluar si policë, që kanë qëlluar njëkohësisht përpara një lokali te rrethrrotullimi i Bradasheshit, duke i marrë jetën Bujar Çelës, vëlla i Talo Çelës. 50-vjeçari është ekzekutuar sapo ka zbritur nga makina e tij për të pirë një kafe.
Raportohet se në momentin që ai ka parkuar makinën dhe ka dalë prej saj duke u drejtuar për në lokal, autorët kanë qëlluar njëkohësisht drejt tij.
Nga kqyrja e trupit të viktimës dhe gëzhojave, dyshohet se atentatorët kanë përdorur armë zjarri pistoletë.
Kujtojmë se Bujar Çela punonte si taksist në zonë dhe priste udhëtarët që vinin nga Greqia. Gjithashtu, Policia ka sekuestruar dhe pamjet e kamerave të zonës, për tëzbardhur sa më shumë detaje rreth ngjarjes dhe autorëve.
Ndërkohë, pronari i lokalit ku ndodhi ngjarja, ka thënë për mediat se në momentin kur ka ndodhur vrasja ai ka qenë në banak dhe nuk i ka parë atetnatorët dhe as nuk ka dëgjuar të shtëna.
“Pinte kafe në mëngjes. S’ka pasur probleme fare. Ka qenë shumë- shumë i mirë. Isha brenda kur ndodhi ngjarja”, ka thënë pronari i lokalit.
Njoftim i Policisë:
Rreth orës 05:45 , në fshatin Bradashesh, Elbasan, në rrethana ende të paqarta është vrarë me armë zjarri para një lokali shtetasi B.Ç., rreth 50 vjeç, banues në fshatin Bradashesh, Elbasan.
Grupi hetimor ndodhet në vendngjarje dhe vijon puna për zbardhjen e plotë të rrethanave të ngjarjes , identifikimin e kapjen e autorit/ëve. Shërbimet e Policisë kanë ngritur pika kontrolli në hyrje -dalje të qytetit të Elbasanit, pika kontrolli në akset rrugore nacionale në bashkëpunim me DVP Durrës, Fier e Tiranë .
Në ndihmë të shërbimeve të DVP Elbasan kanë ardhur dhe FNSH dhe RENEA dhe vijon krehja e zonës.
Pamje nga vendngjarja:
