52-vjeçari Bujar Shega, anëtar i grupit kriminal të Suel Çelës në Elbasan, është ekstraduar nga Milano drejt Tiranës.
Nëpërmjet një njoftimi, Policia ka bërë të ditur se Shega akuzohet nga Gjykata e Posaçme për trafikim të lëndëve narkotike dhe pastrim parash, veprime që ka kryer si pjesë e grupit të strukturuar kriminal.
Gjithashtu, Policia njofton se në vitin 2024, Gjykata e Shkallës së Parë për Krimet e Rënda (GJKKO) i ka caktuar masën e sigurisë “Arrest në burg” për akuzat e trafikimit të narkotikëve dhe pastrimit të parave, të kryera në kuadër të aktivitetit të grupit kriminal.
Njoftimi i Policisë:
Interpol Tirana-Ekstradohet nga Milano, një 52-vjeçar i akuzuar nga GjKKO, për trafikim të lëndëve narkotike dhe pastrim të parave, kryer në kuadër të grupit të strukturuar kriminal.
Në vijim të bashkëpunimit të ngushtë ndërmjet Interpol Tiranës dhe Interpol Romës, u finalizua procedura e ekstradimit në Shqipëri, të shtetasit të shpallur në kërkim ndërkombëtar, të arrestuar në Itali, M. Sh. alias B. Sh., 52 vjeç, i lindur në Elbasan.
Në vitin 2024, Gjykata e Posaçme e Shkallës së Parë për Korrupsionin dhe Krimin e Organizuar i ka caktuar masën e sigurisë “Arrest në burg”, për veprat penale “Trafikimi i lëndëve narkotike” dhe “Pastrimi i produkteve të veprës penale ose veprimtarisë kriminale”, kryer në kuadër të grupit të strukturuar kriminal.
