Të hënën, në gjyqin për vrasjen e Vajdin Lames dhe Klodian Saliut nga viti 2005, dëshmoi Julian Meçe, i deportuar nga Dubai në gusht të këtij viti. Ai u pyet lidhur me njohjen e tij me Luftar Reçin, i cili ka statusin e bashkëpunëtorit të drejtësisë.
Meçe përballë Gjykatës e mohoi njohjen me Reçin dhe theksoi se në periudhën kur ishte përmendur ky emër, ai ndodhej në burg. “Luftar Reçin as nuk e njoh dhe as kam patur lidhje deri kur nisi ky proces,” deklaroi ai.
Ai sqaroi se kishte njohje me Lulzim Berishën dhe Plaurent Dervishajn, me të cilët kishte pasur miqësi dhe ishin komshinj në Durrës. Meçe tregoi se gjatë qëndrimit të tij në Dubai, Dervishaj kishte shprehur habi dhe indinjatë për masat e sigurimit, duke theksuar se nuk kishte lidhje me ngjarjet që po shqyrtoheshin.
“Plaurenti më tha se asgjë nuk e lidh me Viktor Imerin dhe Emiljano Shullazin,” shtoi ai. Ai gjithashtu shprehu shqetësim se Prokuroria nuk kishte marrë parasysh disa prova që mund ta shfajsonin Dervishajn në lidhje me vrasjet.
Dëshmia e tij u kërkua nga disa avokatë në proces. Ndërkohë, Luftar Reçi kishte pretenduar se në vitin 2004, pas një atentati të dështuar ndaj Lulzim Berishës, kishte pasur një takim me Meçën, në të cilin ishin të pranishëm rreth 20 persona të tjerë. Por Meçe e mohoi këtë fakt, duke shprehur se nuk kishte ndodhur një ngjarje e tillë.
