Gjatë orëve të para të mëngjesit të sotëm, pas mesnate u dëgjuan dy shpërthime të fuqishme në qytetin e Shkodrës. Eksplozivi përfshiu një supermarket dhe një biznes të Xhemal Bushatit, ish-kandidatit për kryetar bashkie. Pas kësaj ka reaguar Partia Demokratike.
Përmes një postimi në faqen zyrtare, PD thotë se kushdo që përpiqet të përkulë demokratët me sulme direkte apo indirekte i ka bërë llogaritë gabim.
Kujtojmë se gjatë mesnatës në dy biznese në qytetin e Shkodrës është vënë eksploziv dhe si pasojë e shpërthimit janë shkaktuar vetëm dëme materiale.
DEKLARATË E PARTISË DEMOKRATIKE
Partia Demokratike dënon me ashpërsi sulmin me eksploziv ndaj pronës së kandidatit demokrat për bashkinë e Shkodrës Xhemal Bushati.
Për fat të mirë, familja e zotit Bushati, që banon në të njëjtën godinë, nuk ka lëndime fizike, por ngjarja është tronditëse për ta dhe për qytetarët e Shkodrës. Për fat të keq, gjendja e sigurisë në Shkodër ka vetëm përkeqësim për shkak të aleancës së qeverisë me krimin.
Partia Demokratike u kërkon organeve ligjzbatuese të zbulojnë përgjegjësit e këtij agresioni, që prek drejtpërsëdrejti zotin Xhemal Bushati, një nga personalitetet më të respektuar të qytetit të Shkodrës.
Kush mendon se mund te perkule demokratet sulme direkte ose indirekte, i ka bërë llogaritë gabim!
