Është zbardhur ngjarja që ndodhi mesnatën e kaluar, ku kreut të Sindikatës së Minatorëve të Bulqizës dhe ish-kandidatit për deputet iu vendos tritol në makinë, ndërsa në prangat e policisë ka rënë vëllai i tij.
Kujtojmë se ngjarja ndodhi rreth orës 01:00 në fshatin Dushaj në lagjen “Kodra e Danit”, ku mjetit tip “Benz”, në pronësi të shtetasit Elton Debreshi, ishte parkuar në banesën e këtij të fundit iu vendos eksploziv.
Burime zyrtare nga Policia e Shtetit bën me dije se në prangat e policisë ra shtetasi Alfred Debreshi, 29-vjeç.
Materialet procedurale i kaluan Prokurorisë pranë Gjykatës së Shkallës së Parë Dibër për veprat penale “Shkatërrimi i pronës me eksploziv”; “Mbajtja pa leje e lëndëve plasëse” dhe Deklarim i rremë para oficerit të policisë gjyqësore”. Paraprakisht u dyshua se ngjarja ka të bëj me detyrën e Debreshit dhe policia shoqëroi në komisariat 10 persona. Kujtojmë se Elton Debreshi kandidoi në zgjedhjet e 25 prillit si kandidat i pavarur për qarkun e Dibrës. Ai arriti të mblidhte më shumë se 1350 nënshkrime nga qytetarët e Dibrës për të hedhur kandidaturën.Elton Debreshi është prej 10 vitesh minator dhe në vitin 2019 u zgjodh unananimisht kryetar i Sindikatës së Minatorëve të Bashkuar të Bulqizës, arsye për të cilën u pushua nga puna prej kompanisë Albchrome të Samir Manes.
