Prezenca e variantit “Delta” ose i quajtur ndryshe varianti indian në vendin tonë nuk është konfirmuar ende. Instituti i Shëndetit Publik ka deklaruar ditën e sotme se ka dyshime të arsyeshme, por ende nuk ka prova. Sipas përfaqësueses së ISHP, mostrat janë dërguar në laborator dhe priten rezultatet. Gjithashtu ajo ka thënë se po vazhdojmë me testime dhe monitorime të situatës dhe sapo të kenë evidenca të sakta në lidhje me këto dyshime do ti bëjnë publike.
“Kemi dyshime të arsyeshme dhe prandaj po vazhdojmë të monitorojmë situatën. Por evidenca nuk kemi, zyrtarisht nuk kemi evidenca. Sa i përket hyrjes në vendin tonë ne e kemi deklaruar dhe dyshime të arsyeshme në lidhje me mutacionet të cilat janë fakte të zakonshme në lidhje me viruset respiratore. Mendojmë të vijojmë me testime dhe monitorimin e situatës. Sapo të kemi evidenca të sakta në lidhje këto dyshime të arsyeshme që na kanë ndodhur do t’i bëjmë evidente”, tha përfaqësuesja e Institutit të Shëndetit Publik për mediat.
Kujtojmë se para pak ditësh, sinjale për variantin Delta dha edhe ministrja e Shëndetësisë, Ogerta Manastirliu, e cila ka pranuar se ndodhemi në alert për variantin e ri “Delta që po qarkullon dhe që përhapet më shpejtë. Gjithashtu Manastirliu pranoi se një sërë testesh të dyshuara janë dërguar në Gjermani për konfirmim.
