Vjedhja spektakolare nga Rozeta dhe Havier Dobi është komentuar edhe nga eksperti i kriminalistikës Ervin Karamuço.
Ditën e sotme për “Top News”, Karamuço zbuloi detaje të reja për vjedhjen e 700 mijë eurove nga disa banesa në Tiranë nga pastruesja Rozeta Dobi. Karamuço ka treguar se si Rozeta arrinte të fitonte besimin e pronarëve të shtëpive ku punonte sa që ata i linin dhe çelësin e shtëpisë.
Sipas ekspertit të kriminalistikës fakti që Rozeta Dobi tregohej e thjeshtë, e komunikueshme dhe si një person që ka shumë nevojë për atë punë, i jepte avantazh që punëdhënësit të kishin qasje pozitive ndaj saj duke e rekrutuar. Po ashtu Karamuço shprehet se edhe pagesa prej 20 mijë lekësh të vjetra në ditë që merrte pastruesja, pra një vlerë e ulët, konsiderohet si strategji e mirë për t;u punësuar
“Qante hallet, ishte e komunikueshme, ishte afruar me pronarët sa që i linin çelësat e shtëpisë. Këto para nuk janë grabitur në një akt të vetëm, por janë vjedhur gradualisht në kohë të ndryshme pak nga pak. Ka bërë dhe ajo një punë profesionale për të mos u kapur. Pastruesja fitoi besimin e tyre. Ka punuar 20 vjet, vetëm vitin e kaluar ka hyrë në 10 banesa. Ajo kishte 20 mijë lekë të vjetra ditën e punës. Çmimi i ulët ishte grep i mirë për t’u punësuar nga këto shtëpi,” u shpreh Karamuço.
