Eksperti i pensioneve, Ramadan Kondi, i ftuar në emisionin “Koha për t’u zgjuar”, ka theksuar mungesën e një minimumi jetik të përcaktuar me ligj në Shqipëri, një çështje që, sipas tij, mbetet alarmante dhe pengesë për standardet europiane të jetesës.
“Shqipëria është i vetmi vend në Evropë që ende nuk ka miratuar një minimum jetik,” deklaroi Kondi, duke e cilësuar këtë si një kriter themelor për integrimin në Bashkimin Evropian.
Ai shtoi se garantimi i një niveli minimal sigurie ekonomike për çdo qytetar është jo vetëm një detyrim shtetëror, por edhe një e drejtë bazë në standardet europiane.
Kondi kujtoi se ideja për përcaktimin e minimumit jetik është propozuar fillimisht nga Partia e Lirisë dhe nënvizoi se realizimi i saj është i mundur, për sa kohë ekziston vullneti i duhur politik.
“Minimumi jetik duhet miratuar pa vonesë. Ai është i arritshëm, nëse politika e merr seriozisht,” u shpreh ai.
