Bashkë me prodhimin e disa lloje vaksinash kundër koronavirusit, nga disa kompani të ndryshme, është rritur edhe konkurrenca mes tyre për tregje por dhe për cilësi.
Sot kompania “Pfizer” dhe “BioNTech” kanë nxjerrë rezultate të reja nga vaksina e tyre për COVID-19, që tashmë sipas eksperimentit final, rezulton 95% efektive.
Vaksina e parë efektive ndaj COVID-19 ka përmbushur kriteret e sigurisë për t’u përdorur në kushte emergjence.
Plani i “Pfizer” dhe “BioNTech”, është që të marrin autorizim për punë ditësh që vaksina të përdoret në kushte emergjence përpara se të shpërndahet në gjithë botën. Madje analizat tregojnë se, tani vaksina nuk ka efekte anësore serioze.
Me këtë rezultat “Pfizer” dhe “BioNTech” barazojnë vaksinën e nxjerrë nga konkurrentja e tyre kryesore, “Moderna” që rezultoi gjithashtu 95% efektive.
Fillimisht ishte thënë se, vaksina ka një efikasitet në masën 90%, një pretendim që habiti zyrtarët e shëndetësisë dhe ekspertët.
Kompania pretendon se do të prodhojë 1.3 miliardë doza vaksine në vitin 2021. Fillimisht ata do e nisin me 50 milionë doza këtë vit.
Por ndërkohë, vende si Rusia, Gjermania dhe Kina, pretendojnë se kanë vaksinat e tyre efektive ndaj COVID-19.
Mes disa vaksinave që po provohen në vendin ku lindi COVID-19, ajo e “Sinovac Biotech”, e cila ka rezultuar e suksesshme në fazën e mesme të provave, pasi ka çuar në një përgjigje shumë të shpejtë imunitare në rreth 700 të testuar.
Në rast se edhe kjo vaksinë rezulton efektive në fazën përfundimtare, atëherë botës supozohet t’i shtohet edhe vaksina e katërt efektive ndaj COVID-19.
E para ishte Rusia që me vaksinën “Sputnik V”, ia kishte dalë të krijonte një produkt kundër COVID-19, më pas në Gjermani kompanitë “Pfizer” dhe “BioNTech” njoftuan se kishin prodhuar një vaksinë 90% efektive.
/GazetaReforma.com/
