Ditën e djeshme, policia arrestoi Eduart Lamajn i njohur ndryshe edhe me emrin Leandro Simoni, i cili u plagos në atentatin e ndodhur në Laç, i ndodhur në 31 maj, ku mbetën të pajetë biznesmenët Bujar Lika (Hasani) dhe Paulin Gjergji Marku.
Po ashtu, ditën e djeshme u arrestuan edhe dy mjekët Viktor Marku, 42 vjeç dhe Besim Lama, 46 vjeç, pasi dy ditë më parë kanë kuruar Lamën ilegalisht në një klinikë private, duke mos njoftuar policinë.
Sipas disa burimeve të “gazetareforma.com”, pas arrestimit të tij, Lamaj është “rrëfyer” në polici, duke treguar edhe emrat e porositësve të atentatit të dyfishtë.
Ditën e sotme, policia zbardhi emrat e tre bashkëpunëtorëve të ngjarjes, por jo emrat e porositësve për të cilët ka treguar në dëshminë e tij para policëve Eduart Lamaj.
Ngjarja e rëndë është ende duke u hetuar dhe besohet se për arsye hetimore policia nuk ka publikuar ende emrat e porositësve të atentatit të bujshëm, për t’i shpallur në kërkim.
Nëse publikimi i identiteteve të porositësve nuk bëhet kurrë nga ana e policisë, kjo do të thotë se pala e tretë ka ditur shumë mirë se si t’u mbyllë gojën e për ta lënë ngjarjen në hije, ku për pak kohë do të harrohet nga drejtësia shqiptare.
