Kryebashkiaku i Malësisë së Madhe, Tonin Marinaj ka lënë pas dore Razmën duke e lënë të ‘zhytur’ në plehra, ndërsa më në fund pas një kohe të gjatë është ‘zgjuar’ Agjencia Kombëtare e Mjedisit e cila ka ndëshkuar me gjobë prej 500,000 lekësh ndaj Marinajt. Falë kryetarit të kësaj bashkie, Razma nga një vend turistik, kur e shikon të ndotur nga mbeturinat të lë një përshtypje të keqe, teksa largon edhe turistët.
Kujtojmë se Agjencia Kombëtare e Mjedisit ditën e premte ka kryer inspektime në terren, duke konstatuar sasi të mëdha mbetjesh të hedhura në territorin e Razmës. Pas konstatimit të kësaj situate, Tonin Marinaj i cili zotëron pasuri të patundshme me vlerë 154.3 milionë lekë, është ‘piketuar’ nga AKM dhe është gjobitur me 500,000 lekë.
Por ku ka qenë ky institucion kur plehrat digjeshin në çdo cep të Shqipërisë? Nuk është hera e parë që qytetet kryesore në Shqipëri pushtohen nga mbetjet, pasi kujtojmë 30 korrikun e vitit 2021, ku Fieri u ndot thuajse e gjitha pas djegies së mbetjeve të grumbulluara që nga viti 1974. Dhe jo vetëm, pasi raste të tilla ekstreme janë parë edhe në Durrës, Golem, Kavaje, Shkodër, Elbasan ku mbetjet pushtojnë vendin dhe reagimi i instancave vjen me vonesë, madje edhe për show televiziv.
Në rastin konkret, Tonin Marinaj ka shkelur ligjin dhjetëra herë, por institucioni në fjalë, pra Agjencia Kombëtare e Mjedisit, ka menduar të gjobisë kryetarin e Malësisë së Madhe pikërisht tani. Ndërkohë burime për “Reforma”, bëjnë të ditur se gjobitja e kryebashkiakut të Malësisë së Madhe ka ardhur në një moment kur nuk do kandidojë më për këtë post.
Ajo që vlen të theksohet është fakti se Marinaj ka marrë çdo vit fonde nga qeveria për të vënë situatën e mbetjeve nën kontroll, por me degradimin e situatës në fjalë, Rama duhet të verifikojë zhdukjen e 300 milionë lekë fonde shteti për mbetjet dhe të ardhura nga taksa e pastrimit, që Bashkia Malësi e Madhe mblidhte çdo vit. Gjoba ndaj Tonin Marinajt, vjen në një moment kur mjedisi në Razëm lë shumë për të dëshiruar dhe ka degraduar rrënjësisht.
