Pas disa muajsh akuzash ndaj njëri-tjetrin, lideri i Partisë Demokratike Lulzim Basha nuk po e akuzon më kryeministrin Edi Rama se po mban peng Reformën Zgjedhore.
Por ajo që ka ngritur akuza të forta ndaj të dyja këtyre palëve ditën e sotme, ka qenë deputetja e opozitës, Rudina Hajdari.
Kjo e fundit është shprehur se as kryeministri Rama dhe as Basha nuk e duan reformën zgjedhore.
Madje deputetja i ka cilësuar si diktatorë që duhet të dalin para popullit për të dhënë llogari.
Hajdari ka ngritur pikëpyetje për Këshillin Politik që u mblodh për të reformuar sistemin zgjedhor, por sistemi nuk ndryshoi.
PD-PS dhe LSI ranë dakord se sistemi aktual është më mirë, ndërkohë që e gjithë “lufta” që ka bërë PD ka qenë për ndryshimin e sistemit.
Madje për këtë të fundit shkoi deri në djegien e mandateve e tani kaq lehtë pranojnë propozimin se numërimi i votave është mirë kështu siç ka qenë.
Tashmë kreu i Partisë Demokratike nuk do që të hapë as listat.
Hajdari shprehet se opozita parlamentare me në krye Lulzim Bashën e bëri luftën vetëm për një tender, atë për identifikimin biometrik.
Deputetja u shpreh e indinjiuar duke thënë se për një kohë të gjatë Basha nxorri njerëzit në rrugë për të bërë revolucion dhe po ja dilte, por tenderi ja kishte ndryshuar mendjen.
Kujtojmë këtu një deklaratë të kryeministrit Edi Rama në foltoren e Kuvendit të datës 4 qershor në lidhje me depolitizimin e komisioneve, firmosjen e kontratës dhe tenderin që do ta linte në dorë të PD duke thënë se gjithçka me tenderin do të ndodhte në mënyrë të përshpejtuar dhe se madje nuk do të merrnin fare pjesë në mënyrën sesi do ta organizonte PD ndarjen e punës dhe se kë do të zgjidhte Basha për të bërë elektronikën.
Tenderi i identifikimit biometrik nuk është zënë në gojë nga dy palët politike më të mëdha në vend dhe “lufta” ka vazhduar në rrjetet sociale midis liderëve.
E vetmja që po i kundërshton dhe që po u nxjerr të “palarat” dhe marrëveshjet larg syve dhe veshëve të mediave është deputetja Rudina Hajdari.
Rama u shpreh në foltoren e Kuvendit në datën 4 qershor se ishte i gatshëm të pranonte me çdo kusht çdo zgjedhje të PD vetëm që ky proces i tenderit të realizohej 100%.
Kryeministri shprehu se nuk kishte as dëshirën më të vogël për të ndërhyrë në çdo gjë që do të bënte PD, ta bënin si të donin vetë dhe ata do të ishin “ok”.
“Ta bëjnë vetë, nëse arrijnë ta bëjnë ne jemi “OK”.
Një ekspert ndërkombëtar. Ne nuk duam të hyjmë fare, ta bëjnë vetë, ta marrin dhe ta bëjnë vetë elektronikën.
Nëse ka certifikimin ndërkombëtar ne jemi OK”, është shprehur Rama.
Por një deputet në radhët e PD-së, i cili nuk ka rënë asnjëherë në sy të mediave apo dhe në sy të deputetëve është Endri Hasa.
Sipas disa burimeve të “gazetareforma.com”, mendohet se Hasa do të jetë edhe fituesi i tenderit për identifikimin biometrik.
E gjithë heshtja nga lideri i Partisë Demokratike vjen se ky tender do t’i jepet pa negocim deputetit Endri Hasa.
Ky i fundit që nuk ishte ndjerë kurrë në Kuvend, ka qenë drejtori i AKSHI (Agjensia Kombëtare e Shoqërisë së Informacionit: në vitet 2010-2013.
Si drejtori i këtij institucioni të rëndësishëm, ai ka pasur në kontroll të gjithë sistemin e sigurisë kibernetike dhe teknologjinë e të gjitha institucioneve më të rëndësishme në vend.
Hasa akuzohet se fshiu serverat e ngjarjes së 21 janarit të vitit 2011, kur në shesh mbetën të vrarë 4 qytetarë.
Hasa sot është deputet i PD dhe mund të ketë një “as” nën mëngë që mendohet se do të jetë fituesi i tenderit për identifikimin biometrik, për të cilin ka ende shumë zëra dhe pati një luftë të gjatë midis PD dhe PS, ku madje u pa e nevojshme edhe ndërhyrja e ndërkombëtarëve.
