Komisioni Hetimor Parlamentar do të shkarkojë presidentin Ilir Meta këtë javë ose brenda javës tjetër, në varësi të kohëzgjatjes së procedurës. Gazeta Reforma bën me dije se brenda këtij afati kohor, Meta do të shkarkohet dhe do të zgjidhet një president i ri për Shqipërinë.
Ilir Meta bëhet kështu presidenti i parë që shkarkohet në Shqipëri para se t’i mbarojë mandati. Presidentit Meta i mbaronte mandati në korrik të vitit 2022.
Komisioni Hetimor kundër Metës nisi hetimet pak ditë më parë, ndërsa presidenti i Shqipërisë refuzonte herë pas here pjesëmarrjen në këtë komision, duke u justifikuar me axhendën e tij të ngarkuar.
Partia Socialiste ishte ajo që çoi Metën në Komisionin Hetimor Parlamentar, me akuzën “Tejkalim të kopetencave”. PS i referohej deklaratave të Metës gjatë fushatës elektorale.
Presidenti Meta doli shumë herë në konferenca për shtyp, nga Presidenca dhe nga qytete të ndryshme të Shqipërisë, duke lëshuar dhe deklarata që bënë bujë. Madje, këto deklarata të Metës, PS i konsideroi si nxitje për dhunë dhe kjo ishte një prej arsyeve që e çuan në Komisionin Hetimor.
Situata në Shqipëri pas zgjedhjeve ka qenë shumë e ngarkuar dhe e trazuar. Fillimisht, ishte Sali Berisha që u shpall “non-grata” nga SHBA, ndërsa tani do të vijë dhe shkarkimi i presidentit Meta.
