Për kryeministrin Edi Rama, nuk mjaftuan dy mandate të mbushura me premtime boshe dhe propagandistike. Tashmë kryeministri “lut” një mandat të tretë për të njëjtin premtim që u zotua tre vite më parë.
Bëhet fjalë për landfillin e Porto Ramanos, që sipas premtimeve të qeverisë aktuale, do të kthehej në një park të gjelbër.
Sipas zotimeve të dhëna nga vetë kryeministri, ky projekt duhet të ishte mbyllur që në vjeshtën e 2019, por deri më tani shihen vetëm punime dhe ende projekti nuk ka marrë pamjen finale.
Saktësisht premtimi u dha në qershor të vitit 2018. Kryeministri Edi Rama deklaroi se vendgrumbullimi i mbetjeve në Porto Romano, në Durrës do shndërrohej në një park të gjelbër brenda 18 muajve.
“Ne kemi marrë një angazhim që ta mbyllim zonën kanceroze të fushës së mbetjeve. Besoj deri në vjeshtën e vitit të ardhshëm”, është shprehur Rama në 2018-n.
Pavarësisht se në dy mandate, Rama nuk mundi të mbante premtimet e dhëna, është kujtuar sërish vetëm një muaj larg zgjedhjeve.
Sot kryeministri ka inspektuar punimet në këtë landfill, atje ku po ndërtohet Ekoparku i Durrësit.
Rama tha se ky është vendi që tregon qartë se pse PS-së i duhet mandati i tretë, pasi në të kundërtën rrezikon të shkojë dëm.
“Ky është vendi fiks që të shpjegohet se pse na duhet mandati i 3. Për të mbaruar punën dhe ndryshe nuk ka shans që të mbarojë pasi do të shkojë dëm. Me dekada të tëra këtu kishte mbeturina. Është koha që të çojmë Durrësin në një nivel tjetër, janë hedhur bazat”, tha Rama.
Por kjo taktikë e Ramës nuk është e panjohur. Jo vetëm landfilli, por edhe rindërtimi nga tërmeti është një tjetër çështje që po propagandohet, ndërsa duhet të kishte përfunduar brenda mandatiti të dytë, sikurse vetë kryeminstri premtoi.
