Pandemia e Covid-19 vazhdon të japë efektin shkatërrues afatgjatë të saj në ekonominë e vendit. Gjatë këtij viti iu dha një goditje e fortë ekonomisë me humbjet të cilat sa vijnë e shtohen.
Sipas studimit dhe hulumtimit të INSTAT-it, ekonomia shqiptare ka rënë me gati 3.5% në tremujorin e tretë, pas një tkurrjeje me 10.2% në tre mujorin e dytë dhe 2.5% në tre mujorin e parë.
Krahasimi me vitin 2019
Përgjatë 9-mujorit të vitit 2020, Prodhimi i Brendshëm Bruto (GDP), pra vlera e mallrave dhe shërbimeve përfundimtare të prodhuara nga ekonomia vendore për këtë 9 mujor, ishte 1.17 trilionë lekë ose thënë ndryshe 9.4 miliardë euro.
Kjo shumë e krahasuar me të njëjtën periudhë të një viti më parë, ka prodhuar rreth 90 miliardë lekë ose ndryshe 720 milionë euro më pak.
Krahasuar me rënien ekonomike të një viti më parë, ekonomia ka humbur për 9-mujorin edhe rreth 300 milionë euro, shumë kjo e llogaritur si rritja e munguar nëse nuk do të kishte shpërthyer pandemia.
Kësisoj për këtë 9 mujor, humbjet e shkaktuara nga pandemia llogaritur edhe me rënien ekonomike e vitit të kaluar dhe rritjes së munguar të këtij viti për shkak të pandemisë, i kanë kaluar mbi 1 miliardë euro.
Kujtojmë se kjo është hera e parë, të paktën që prej vitit 2009, kur INSTAT raporton të dhënat, që vlera e Prodhimit të Brendshëm Bruto është në rënie.
Të dhënat e INSTAT tregojnë se tkurrja më e fortë ishte në tremujorin e dytë me 570 mln euro më pak se e njëjta periudhë ne 2019-tën, 94 milionë euro në tre mujorin e parë si dhe 30 milionë euro në tre mujorin e tretë.
Sektorët më të goditur nga pandemia
Sektori më i goditur sipas INSTAT, ka rezultuar sektori i tregtisë, i transportit, aktivitetet e akomodimit dhe shërbimit ushqimor, i cili i gjithi si një sektor zinxhir, ka qarkulluar rreth 250 milionë euro më pak në krahasim me 9-mujorin e vitit të kaluar.
Kjo rënie drastike tregon një sinjal të dobësisë së konsumit si dhe të pasojave që kanë dhënë se aktivitetet e akomodimit dhe shërbimit ushqimor kanë të bëjnë me rënien e turizmit.
Kujtojmë se përgjatë këtij 9-mujori, hyrjet e shtetasve të huaj në Shqipëri, ranë me 61%, ose 3.3 milionë turistë më pak.
Sektori i dytë me rënien më të fortë është industria gjithsej me 170 milionë euro dëme, ku tkurrja më e madhe ishte në industrinë nxjerrëse, teksa në prill disa prodhues të mëdhenj të naftës, përfshirë Bankers Petroleum, ndërprenë përkohësisht prodhimin.
Më pak e ndikuar ishte industria përpunuese, që u gjallërua sidomos në tremujorin e tretë.
Po ashtu edhe aktivitetet shkencore, profesionale , administrative dhe mbështetëse kanë qarkulluar rreth 90 milionë euro më pak.
Ndërkohë më pak të goditura ishin shërbimet financiare e sigurimet, ndërtimi, bujqësia, ndërsa i vetmi që ka vijuar rritjen në kohë pandemie është aktiviteti i pasurive të paluajtshme./Gazetareforma.com/
