Ngacmimet seksuale sa më shumë kohë kalon aq më shumë shtohen, dhe rasti i radhës ka qenë pikërisht ditën e sotme. Një denoncim i bërë publik sërish nga ish-kryeministri, Berisha, ka zbuluar se një efektiv policie në Shkodër është arrestuar brenda ambienteve të Fakultetit Juridik të Universitetit “Luigj Gurakuqi” pasi ky i fundit ka tentuar të përdhunojë një nga studentët. Të paktën ky ka qenë motivacioni i ngritjes së akuzës.
Ai/ajo shkruan se polici ka dy ditë që ngacmon vajzat e fakultetit dhe njërën ka tentuar ta përdhunojë. Polici është efektiv i forcave të ndërhyrjes së shpejtë, sqaron qytetari. Për t’i ardhur në ndihmë studenteve të shokuara, djemtë në fakultet kanë ndërhyrë dhe e kanë mbajtur të mbyllur në banjo deri sa ka ardhur policia.
Sipas raportimeve që vijnë nga Ballkanweb, efektivi tashmë është marrë në pyetje nga Policia e Shkodrës, ku edhe i ka mohuar akuzat për tentim përdhunimi apo abuzimi ndaj vajzës. Mirëpo ai është shprehur se e pëlqente vajzën dhe i kishte shprehur asaj ndjenjat e tij, por kur ajo e refuzoi, ai e ka kapur prej krahu dhe vajza është trembur për shkak të armës. Mësohet se punonjësi i policisë është rreth 25-26 vjeç.
