Ditën e sotme zhvillohet seanca parlamentare dhe pritet të kalojë sot në seancë paketa fiskale ndërkohë që fermerët janë mbledhur para tij duke protestuar kundër saj.
Kryeministri Edi Rama ka mbërritur për të marrë pjesë në seancë dhe i ka ftuar fermerët të diskutojnë brenda.
“Hajde, kush do vijë me mua të flasë brenda, se këtu në rrugë nuk flitet. Hajde, kush do vijë tjetër? Hajde! Edhe ai që ngriti dy gishtat. S’ka problem të gjithë bashkë se kjo nuk është punë demokratësh”, iu tha Rama fermerëve, të cilët kanë pranuar ftesën dhe kanë shkuar pas kryeministrit.
Kujtojmë që më herët Shoqata e Eksportuesve Shqiptarë të Fruta-Perimeve, Këshilli i Agrobiznesit Shqiptar (KASH) dhe Sindikata e Fermerëve, në një letër drejtuar kryeministrit Edi Rama, ministres së Financave dhe Ekonomisë, Delina Ibrahimaj, dhe ministres së Bujqësisë dhe Zhvillimit Rural, Frida Krifca, kundërshtuan propozimet e paketës fiskale 2022.
Shoqatat pohuan se këto ndryshime vijnë në një kohë kur mbjelljet e fermerëve janë 30% më të ulëta se vjet, për shkak të mospërballimit të kostove. Sipas tyre miratimi i ndryshimeve fiskale do të rëndonte situatën në prodhimet bujqësore.
Ndër kërkesat kryesore të shoqatave prodhuese dhe Sindikatës të Fermerëve janë subvencionim direkt për fermerët që kultivojnë perime të freskëta e ngjashme me skemën e 2019 të prodhuesve të qumështit. Shtyrjen në kohë të aplikimit të TVSH-së në shkallën 10% si kundër është propozuar në paketën fiskale për vitin 2022 për inputet .
