Pas refuzimit të prokurorëve të SPAK-ut dhe Gjykatës Kushtetuese, ka qenë radha e Inspektoriatit të Lartë të Drejtësisë, për t’i dhënë goditjen e fundit, komisionit ‘Xhafaj’. ILD ka qenë e fundit në radhë që ka refuzuar pjesëmarrjen në komision, ndërkohë që më herët diçka të tillë e kishin bërë edhe institucionet e tjera të pavarura të Drejtësisë. Më herët, Gjykata e Lartë, ishte institucioni i katërt zyrtar që refuzoi të jetë pjesë e Komisonit Antikorrupsion. Në letrën drejtuar Fatmir Xhafajt, firmosur nga kryetari i Gjykatës së Lartë, Sokol Sadushi, argumentohet se “nuk vlerësohet si zgjidhje e përshtatshme me misionin e gjyqtarit, nuk vlerësohet si zgjidhje e përshtatshme në përmbushje të misionit të Komisionit të Posaçëm”, por se nga ana tjetër “janë gati nëpërmjet 3 këshilltarëve të institucionit të marrin pjesë në rolin e vëzhguesit, e të japin mendime dhe sugjerime pas një analize”. Burime bëjnë me dije se edhe ILD ka refuzuar pjesëmarrjen duke i kthyer një përgjigje negative kuvendit.
Edhe Prokuria e Përgjithshme pritet të ketë të njëjtin qëndrim, edhe pse ende nuk është konfirmuar zyrtarisht nga ky institucion. Ndërkohë në forumin rajonal të mirëqeverisjes dhe luftës kundër korrupsionit ku ishte i pranishëm dhe ambasadori Gonzato dhe kryetarja e Kuvendit Spiropali, Dumani vuri theksin tek pavarësia e institucionit dhe tek forcimi i saj.
