Deputeti i Partisë Demokratike, Dashnor Sula, gjatë fjalës së tij në kuvend të enjten (15 shtator) ka lëshuar akuza të forta ndaj qeverisë. Sula deklaroi se mbrëmjen e 14 shtatorit të këtij viti, Prokuroria ka lëshuar 3 urdhër-arreste për 3 oligarkë, por më pas është tërhequr. Arsyeja? Presioni që iu është bërë prokurorëve të mos ndërmarrin të tilla veprime. Kjo tregon se edhe kur prokurori do ta kryejë detyrën e tij siç duhet, nuk lejohet nga “hijenat” që ka sipër kokës të zbatojë ligjin mbi oligarkët që mbushin xhepat e pushtetarëve, gjyqtarëve dhe prokurorëve të korruptuar. Kjo tregon se sa i pafuqishëm është ligji përballë këtyre oligarkëve të cilët janë të paprekshëm në këtë vend dhe nuk pyesin as për gjykatë as për prokurori.
Sipas deputetit urdhrat e arrestit ishin për biznesmenët që bëjnë ndërtime pa leje në kryeqytet, por që nuk është lejuar prekja e tyre. Ai sfidoi Prokurorinë që të dalë dhe të përgënjeshtrojë lajmin nëse nuk është i vërtetë.
“Po ju them edhe lajmin e fundit. Mbrëmë kanë dalë tre urdhra arresti për tre oligarkë për ndërtim pa leje, dhe janë tërhequr se u është bërë presion. Nuk po i them emrat. I është bërë presion prokurorisë dhe nuk janë arrestuar. Kjo është e vërteta që ta dini. Le të dalë e ta përgënjeshtrojë Prokuroria e Tiranës.”, tha ai.
Deklarata e Sulës konfirmon faktin që aksioni i qeverisë për katet pa leje është thjesht një show për të larguar vëmendjen nga kriza që po përjetojnë shqiptarët. Kjo tregon se edhe drejtësia është e kapur nga shteti, sepse po të ishte ndryshe ata urdhra arresti do të zbatoheshin.
