Para dy ditësh një ngjarje e rëndë tronditi Korçën.(Lexo këtu)
Zamir Topi vrau me sëpatë shitësinë ambulant Dashnor Osmani.
Së fundmi, Topi ka zbardhur detaje të reja rreth vrasjes makabre.
Zamir Topi, ka rrëfyer se kishte disa vite që kishte hyrë në konflikte verbale me viktimën Dashnor Osmani, pasi ky i fundit e akuzonte herë pas here se i kishte zënë dhe prishur varrin e nënës, në varrezat e fshatit Poçestë të Libonikut.
Këto debate kanë zgjatur deri më 28 janar të këtij viti, kur sherri përfundoi në mënyrë tragjike.
Lidhur me këtë ngjarje autori shprehet
“…pasi debatuam me Dashnorin për punën e dëmtimit të varrit,i kam thënë se ku do ta varros babain kur të vdes unë? Më pas Dashnorit, ia kam kthyer duke i pohuar që mos më dil më përpara dhe jam larguar prej tij. Ndërkohë në 28 janar 2020 rreth orës 14:00 unë e kam parë Dashnorin, duke shitur banane në Korçë dhe ai më ka dalë përpara si i fortë, duke më prerë rrugën por pa më folur”.
Më pas Zamir Topi, ka shkuar në një dyqan, ku tregtoheshin vegla pune dhe ka kërkuar të blejë një sepatë.
Sëpata kushtonte 600 lekë, ndërsa ai kishte me vete vetëm 400 lekë.
Kështu, për të plotësuar sasinë e lekëve prej 600 lekësh, Zamiri shkoi te berberi në Korçë, ku ai qethet gjithmonë dhe i ka kërkuar në formën e borxhit, 2 mijë lekë të vjetra, por nuk i ka treguar se përse i duheshin lekët.
Pasi ka marrë lekët, është rikthyer në ambientet e dyqanit ku ka blerë sëpatën.
Më pas, ai ka shkuar në drejtim të viktimës, të cilin pa paralajmërim e ka qëlluar disa herë në kokë me sëpatë, duke e lënë të vdekur në vend.
Ndonëse Topi është përpjekur të largohet me vrap, ai është kapur shumë shpejt nga një patrullë policie në qytetin e Korçës.
Ndaj tij është ngritur akuza e “Vrasjes me paramendim” dhe pritet që ditën e nesërme ai të dalë përballë gjykatës së Korçës.
