Ministri i Brendshëm Sandër Lleshaj, ka reaguar pas një heshtje të gjatë, në lidhje me vrasjen e 25-vjeçarit Klodian Rasha nga Policia orët e para të mëngjesit të djeshëm.
Ndërkohë që në njërën anë ka protesta dhe marshime sensibilizuese për ngjarjen e rëndë dhe i riu po përcillet në banesën e fundit, ministri Lleshaj ka reaguar nëpërmjet një postimi në rrjetin social Facebook, ka shkruar se e vërteta është ngushëllimi më i madh.
Ndër të tjera Lleshaj ka ngushëlluar familjarët e 25-vjeçarit për humbjen tragjike të tyre.
Ministri i Brendshëm ndërkohë ka theksuar se kjo ngjarje ka prekur shumë njerëz, të afërm të viktimës, qytetarë të zakonshëm, pjesëtarët e Policisë së Shtetit dhe gjithë të tjerët, duke shprehur besimin se organet ligjore do të zbardhin shumë shpejt hetimet mbi vrasjen e Klodian Rashës.
Postimi i plotë:
E VËRTETA ËSHTË NGUSHËLLIMI MË I MADH
Ka shumë arsye se përse e ndjej fort se çfarë do të thotë humbja e Klodian Rashës për prindërit dhe familjarët e tij. Në këto çaste të hidhërimit të madh, u shpreh atyre ngushëllimet e mia më të thella për këtë humbje tragjike.
Në të njëjtën kohë, shpreh besimin tim të plotë se organet ligjore përgjegjëse do të finalizojnë shpejt, saktë, drejt dhe jashtë çdo ndikimi hetimet për vrasjen e Klodian Rashës.
Kjo ngjarje ka prekur shumë njerëz, të afërm të viktimës, qytetarë të zakonshëm, pjesëtarët e Policisë së Shtetit dhe gjithë të tjerët.
Sot të gjithë kanë nevojë për qartësimin e plotë dhe shterues të rrethanave që sollën këtë ngjarje tragjike dhe autoritetet përgjegjëse ligjore duhet të përmbyllin sa më shpejt detyrën e tyre në shërbim të së vërtetës dhe të drejtësisë./Gazetareforma.com/
